א גאר מערקווירדיגע נייעס ווערט פארשפרייט היינט צווישן אלפי חסידי גור איבער די וועלט און איבעראל, אז ביי א באשיידענע מעמד מכירה נעכטן זונטאג איז די גרויסע ביהמ"ד דחסידי גור אין ירושלים פארקויפט געווארן פאר איינער פון די חסידים, פארן מינימאלן סומע פון בלויז צען שקל.
צדיקי בית גור האבן זיך געפירט צו פארקויפן די זכות פונעם בית המדרש, כדי נישט צו דארפן טראגן אליינס דעם געוואלדיגן אחריות וואס א בית המדרש האט, ווען נישט אלעמאל קען מען שטיין על המשמר אז אלעס פירט זיך כראוי וכיאות, צו בעניני מורא מקדש אדער קדושת בית המדרש און דאס גלייכן.
די דריי ברידער הרה"ק בעל בית ישראל, הרה"ק בעל לב שמחה, און הרה"ק בעל פני מנחם מגור זי"ע, פלעגן פארקויפן די אייגענטום פונעם בית המדרש פאר איינער פון די עלטערע חסידים, און אזוי אויך האט כ"ק אדמו"ר מגור שליט"א געטון ווען מען האט געענדיגט בויען די גרויסע ביהמ"ד אויף רחוב ירמיהו, ווען דער רבי האט פארקויפט די אייגענטום פאר הרב החסיד הישיש ר' חיים ישראל וויינשטיין ז"ל מזקני חסידי גור.
מיט עטליכע יאר צוריק איז ר' חיים ישראל נפטר געווארן, און זינט דאן האט מען נאכנישט פארקויפט די אייגענטום פון די שוהל פאר א אנדערן. אצינד בהוראת הקודש פון כ"ק אדמו"ר מגור שליט"א, האט הרב החסיד ר' איטשע מאיר טאומאן הי"ו מחשובי חברי הנהלת הביהמ"ד, דורכגעפירט די מקח כדת וכדין, ווען ער האט פארקויפט די ביהמ"ד פאר בלויז צען שקל, פאר הרב החסיד ר' יצחק מאיר שפערנאוויטש הי"ו מזקני חסידי גור.
