שטייענדיג צוויי יאר נאך די פטירה פון הגאון הגדול רבי מתתיהו סאלאמאן זצ"ל משגיח ישיבה בית מדרש גבוה אין לעיקוואד, האבן די תלמידי הישיבה אויפגענומען מיט פרייד איבער די התמנות פון א נייע משגיח אין ישיבה, דער חשובער משגיח פון די מירער ישיבה אין מודיעין עילית, הגאון הגדול רבי ראובן העכסטער שליט"א, וועלכער וועט פון היינט און ווייטער דינען אלס משגיח אין ביידע ישיבות, איינגעטיילט לויט די טעג פון די חודש.
די אנטוויקלונג איז גאר מערקווירדיג בעולם הישיבות והמוסר, ווען דער משגיח וועט זיין יעדן חודש אין ביידע ישיבות, סיי אין אמעריקע און סיי אין ארץ ישראל, וואו ער וועט אויפטרעטן מיט מוסר שמועסן און דברי חיזוק והדרכה.
דער נייער משגיח איז א תלמיד פון ישיבת בית מדרש גבוה אין לעיקוואד, וואו ער איז געווען א תלמיד מובהק פונעם משגיח הגאון הגדול רבי נתן מאיר וואכטפויגל זצ"ל, מיט יארן צוריק האט הגאון הגדול רבי נתן צבי פינקל זצ"ל ראש ישיבת מיר אים גערופן פון אמעריקע צו זיין דער משגיח אין ישיבת מיר אין בראכפעלד מודיעין עילית, און זינט דאן טוען טויזענטער אידן זיך קלאמערן לאורו זיך דורכרעדן מיט אים עצה ותושיה.
נאך וואס הגאון ר' ראובן האט ערהאלטן די בקשה פון די ראשי הישיבות אין לעיקוואד, האט ער זיך דורכגערעדט מיט די גדולי ראשי הישיבות בארה"ק, הגאון הגדול רבי משה הלל הירש שליט"א ראש ישיבת סלאבאדקע, און הגאון הגדול רבי אליעזר יהודה פינקל שליט"א ראש ישיבת מיר, נאך וואס ביידע ישיבות האבן געוואלט האבן דעם גאון אלס משגיח, און קיינער האט נישט געוואלט אויפגעבן דערויף.
נאך א לענגערע דין ודברים איז באשטעטיגט געווארן אז דער משגיח וועט האבן דעם פאסטן אין ביידע ישיבות, צוואנציג טעג אין א חודש וועט ער זיך געפונען אין ארץ ישראל און אויפטרעטן מיט די שיעורים און דרשות ווי ביז היינט, און צען טעג אין די חודש וועט ער זיין אין לעיקוואד, און איבערגעבן שמועסן פאר די תלמידי הישיבה, אנגעהויבן פון קומענדיגע וואך פרשת יתרו.
