בחצר הקודש צאנז איז געמאלדן געווארן דעם שבת קודש איבער א נייע וועד וואס איז געווארן אוועקגעשטעלט בברכת הקודש פון כ"ק אדמו"ר מצאנז שליט"א, א וועד פון עטליכע אינגעלייט וואס זענען געשטעלט צו זיכער מאכן אז ביים אריבערגיין בפני הקודש זיך וואונטשן און סיי וואס, זאל אלעס אריבערגיין מיט רואיגקייט און הרחבת הדעת.
אין א ספעציעלע מודעה אונטערגעשריבן דורך די משמשים בקודש הרב אברהם דוד שעכטער הי"ו און הרב בערל שטעמער הי"ו, שרייבן די גבאים אז לעצטנס זעט מען ווי דאס אריבערגיין בפני הקודש שטויסט זיך אן מיט שווערע פראבלעמען און שטופענישן, און עטליכע מאל איז עס שוין צוגעקומען צו א מצב פון סכנת נפשות ממש.
דעריבער שטעלט מען אוועק דעם נייעם וועד "חבורת מכוונים בקודש", וואס וועלן זיין פאראנטווארטליך אויסצוארבעטן די פונקטליכע סדר וויאזוי אויסצושטעלן דאס אדורכגיין ביים רבי'ן, צו וואונטשן א גוט שבת, גוט יו"ט, און ביי אנדערע געלעגנהייטן, און סיי ווען מען גייט אריבער ביים רבי'ן פאר סיי וועלכע סיבה, מיט א ספעציעלע אויסשטעל פאר די אינגעלייט, די בחורים, די עלטערע אידן, און אזוי ווייטער.
