די חשוב'ע בחורי חמד פון "ישיבת היכל התלמוד", וואס שטייט ווי א לייכטורעם אינעם עיר ואם בישראל בארא פארק, זענען נאך אלץ אונטער דער רישומא דקדושה נאכן מיטהאלטן א העכסט-התרוממות'דיגן חמשה-עשר-בשבט טיש דורך כ"ק אדמו"ר מראחמיסטריווקא ספרינג-וואלי שליט"א, און האט אריינגעבלאזן א מורא'דיגן רוח של התעלות אין אלע בחורים.
די ישיבת היכל התלמוד בהנהלת הרב יואל ביטמאן שליט"א מנהל הישיבה איז פקיע שמיה אינעם עולם הישיבות, וואו יעדער איינציגער בחור ווערט נתעלה באופן נשגב ונעלה, און גייט ארויס אלס אויסטערלישער "מצוין" אין די ג' עמודי עולם; תורה, עבודה און גמילות חסדים, אויף וועלכע די ישיבה שטייט.
ישיבה "למצוינים" – א ישיבה וואו מ'ווערט א מצוין בס"ד!
די הויכגעשעצטע רמ"י הישיבה זענען א געקליבענע צאל מחנכים וועלכע לייגן אריין זייער גאנצע הארץ און נשמה פאר די הצלחה פון די תלמידים, הלה המה: הרב פנחס גוטמאן שליט"א ראש הישיבה, ואתו עמו די סגן מנהל הרב צבי אלימלך אייכנשטיין שליט"א, און די מגידי שיעור הרב מרדכי דוב זינגער שליט"א, הרב ברך פאשקעס שליט"א, הרב יוסף משה רוטנער שליט"א, הרב דוד יואל מייזליש שליט"א, הרב ישראל ברוך ווידער שליט"א, און הרב שמואל אליעזר הערשקאוויטש שליט"א, וועלכע זענען אלע בקיאים במלאכתם באומנות יתירה אינעם עולם החינוך, האבן איין מטרה און ציל; אויסצושלייפן די טייערע דימאנטן, און ארויסברענגען פון יעדן איינעם זיין שענסטן גלאנץ און כוחות, און זיי אהערשטעלן בעז"ה אויף די ריכטיגע שינעס פאר א מוצלח'דיגן לעבן ברוחניות ובגשמיות.
די בארימטע ישיבה האט שוין אפגעצייכנט גאנצע צען יאר מיט א סוקסעספולע הצלחה ראטע דינענדיג אלץ מקום תורה וואו יעדער איינציגער תלמיד ווערט באגלייט מיט ווארימקייט און געשמאק, דורך די העכסט-געטרייע מחנכים און מרביצי תורה וועלכע ברענגען ארויס די אינערליכע כשרונות און כוחות פון די חשובע בחורים אויסצושטייגן לאילנא רברבי בסייעתא דשמיא.
על ג' דברים העולם עומד; תורה, עבודה וגמילות חסדים
אין די לעצטע וואכן פון די ימי השובבי"ם איז ביני כותלי עמודי דגירסא געלאזט געווארן אין גאנג דער "העולם עומד" פראגראם, אויפצוהייבן די בחורים מיט נאך א שלב אין די ג' עמודי עולם וועלכע האלטן די וועלט, ביי וועלכע יעדער בחור האט זיך מקבל געווען א קבלה טובה בעניני תורה ועבודה וגמ"ח יעדער לפום דרגא דיליה.
בתורה – איינער האט זיך אונטערגענומען א קבלה; צו לערנען די ערשטע צען מינוט פונעם סדר ברציפות, א צווייטער איז געגאנגען א דרגא מער; צו לערנען א שעה ברציפות בבחינת מעלין בקודש. בעבודה –טייל בחורים האבן זיך מקבל געווען אינזינען צו האבן פירוש המילות ביי א חלק פונעם דאווענען. אנדערע האבן געמאכט א קבלה נישט אויסרעדן ביים דאווענען, אא"וו. ובגמילות חסדים – יעדער האט זיך מקבל געווען צו טון א טובה וחסד מיט א צווייטן, צי זאל עס זיין בגשמיות, צי זאל עס זיין ברוחניות; אמאל צולערנען מיט א חבר, אדער אפילו מחזק זיין מיט גוטע דברי חיזוק ועצות.
שולחן הטהור לרגל חמשה עשר בשבט
לאור זה האבן די בחורים געהאט די זכיה צו מקבל פנים זיין א גרויסן גאסט אין דער ישיבה, ה"ה כ"ק אדמו"ר מראחמיסטריווקא ספרינג וואלי שליט"א, וואס איז געקומען מעריך זיין שולחנו הטהור ביום המסוגל חמשה עשר בשבט אינאיינעם מיט די חשובע בחורים, און עס האט זיך אנגעזעהן א שטארקע חביבות פארן רבי'ן שליט"א צו קענען מיטהאלטן פונדערנאנט וויאזוי די בחורים שטייגן מעלה בסולם העולה בית א-ל על דרך התורה והיראה.
בעת דער רבי שליט"א איז אנגעקומען האבן זיך די בחורים אויפגעשטעלט במלוא קומתם מיט א חרדת קודש, און געווארט ביז דער רבי האט זיך געזעצט אויפן פלאץ, דאן האבן די בחורים געזונגען ווארימע און הארציגע ניגונים צווישן זיי 'אילן', 'יהא רעווא קדמך' און נאך וועלכע דערווארימען דאס הארץ לאבינו שבשמים, מ'האט אויסגענוצט די הייליגע מינוטן פונעם יום המסוגל צו שופך שיח זיין צום בוכ"ע זוכה צו זיין צו זרע ברך ה' עוסקים בתורה ובמצוות.
שפעטער האט דער רבי שליט"א טועם געווען פון די פירות, און געטיילט שיריים פון די פרוכט פאר די מרביצי תורה און פאר יעדן בחור מיט אן אויסגעגאסענע חביבות.
במה אברכך; דברות קודש
דערנאך האט דער רבי שליט"א געוואונטשן לחיים און משמיע געווען דברות קודש לכבוד היום, ארויסברענגענדיג דעם גודל היום פונעם יו"ט חמשה עשר בשבט ר"ה לאילנות, און וואס מ'קען ארויסנעמען דברי חיזוק וויאזוי אויסצונוצן די ימי הבחרות מיט שמחה.
נאכן דברות קודש האבן די ראשי הישיבה איבערגעגעבן פארן רבי'ן איבערן 'העולם עומד' פראגראם, ביי וועלכע אלע בחורים האבן פה אחד זיך אונטערגענומען צו ארבעטן פון יעצט ביז סוף זמן אויף די שלשה דברים וואס העולם עומד בהם. דער רבי שליט"א האט געהערט איבער די מורא'דיגע קבלות פון די בחורי חמד, דערביי האט דער רבי שליט"א אויסגעדרוקט א געוואלדיגן קורת רוח והנאה, און געבעטן אז מ'זאל אנהאלטן די קבלות מיט א פעסטקייט, ובזכות זה וועט מען געהאלפן ווערן מיט אלע ברכות.
א טאג שפעטער האט דער רבי שליט"א אנגערופן די ראשי הישיבה וואו ער האט איבערגעגעבן אז ער איז שוין געווען אין עטליכע ישיבות, אבער ער איז ספעציעל באאיינדרוקט פון די ישיבה, וואו ער האט געזען און מיטגעהאלטן אז ס'איז דא אן אמת'דיגע קשר פון די ראשי הישיבה און די רמ"י הישיבה צו אלע בחורים, ס'איז נישט סתם א ישיבה. יעדער מרביץ תורה האט אן אויסטערלישן חביבות צו יעדן תלמיד. דאס איז עפעס וואס מ'טרעפט נישט איבעראל.
דער באזוך פונעם ראחמיסטריווקא רבי שליט"א האט איבערגעלאזט א געוואלדיגן רושם ביי אלע בחורים, און ס'איז ניכר די אויסטערלישע התמדה בתורה מיט די שטארקע ערנסטקייט ביים דאווענען, און אזוי אויך די אויסערגעווענליכע איבערגעגעבנקייט איינער צום צווייטן.
אלא יהי רצון שכל נטיעות יהיו כמותך.
