במקהלות אלפי ישראל איז פארלאפענע וואך געפייערט געווארן די גרויסארטיגע חגיגה "סיום הרמב"ם", נאך וואס צענדליגע טויזענטער אידן ברחבי תבל האבן מסיים געווען גאנץ ספר הרמב"ם צום פינף און פערציגסטן מחזור, אין ראם פון די סדר לימוד הרמב"ם וואס איז געווארן איינגעפירט דורך כ"ק אדמו"ר מליובאוויטש זצ"ל.
די גרויסארטיגע מעמד איז פארגעקומען אין די גיגאנטישע בעדפארד יוניאן ארמארי אין קראון הייטס, וואס איז געווארן איבערגעפולט דורך די טויזענטער לומדים פון נאנט און ווייט, איידער די מעמד זענען די ראשי העסקנים און רבני חב"ד ארויף לבתי אדמורי"ם ורבנים מקבל צו זיין מברכות קדשם, צווישן זיי ביי כ"ק אדמו"ר מצאנז קלויזענבורג שליט"א וועם מען האט מכבד געווען צו אויפטרעטן מיט די צענטראלע משא המעמד, כ"ק אדמו"ר מסקווירא שליט"א וועלכער האט געשיקט מברכות קדשו, און נאך א רייע גדולי ישראל.
דער צאנז קלויזענבורגער רבי שליט"א האט שוין אין די פארגאנגענהייט אויפגעטרעטן מיט א דרשה ביי איינער פון די סיומים, ווען עס איז געפראוועט געווארן דעם ערשטן סיום הרמב"ם אין ירושלים עיה"ק, מיט איין און פערציג יאר צוריק חודש אייר תשמ"ה.
אנהייב פון די גרויסע מעמד האט מען געהערט דרשות פון חשובע רבנים, און נאך וואס כ"ק אדמו"ר מצאנז קלויזענבורג שליט"א איז ערשינען האט מען געזאגט פרקי תהלים, און דער יושב ראש הרב וועלוול גוטמאן הי"ו האט מקדם געווען בברכה דעם חשובן גאסט, און מכבד געווען דעם רבי'ן אויפצוטרעטן מיטן משא המעמד.
דער רבי האט אנגעהויבן די דרשה ארויסהייבענדיג די נאנטע קשר פון צדיקי בית צאנז און חב"ד, אינמיטן די דרשה האט זיך דער רבי אנגעהויבן נישט גוט שפירן און איז פלוצלינג אוועקגעפאלן רח"ל, די הצלה לייט זענען אלארמירט געווארן און האבן ב"ה באוויזן צו סטאביליזירן דעם מצב, בחסדי ה' איז גלייך קלאר געווארן אז עס איז געקומען אין רעזולטאט פון א אלגעמיינע שוואכקייט, און צוביסלעך איז דער רבי צוריקגעקומען צו די כוחות ב"ה און צוריק ארויף אויפן בימת הכבוד באשיינען דעם מעמד.
כ"ק אדמו"ר מראחמיסטריווקא שליט"א פון אוקענוויין איז מכובד געווארן צו מאכן דעם סיום, און דערנאך האט מען געהערט א דרשה פון הגה"צ ר' מיכל שטיינמעטץ שליט"א דומ"ץ סקווירא ב"פ, וועלכער האט איבערגעגעבן דעם ברכת הקודש פון כ"ק אדמו"ר מסקווירא שליט"א. הגה"צ ר' הערשל ראטטענבערג שליט"א רב חסידי גור אין אמעריקע האט איבערגעגעבן דעם ברכת הקודש פון כ"ק אדמו"ר מגור שליט"א, און הרב ליפא האגער שליט"א אייניקל פון כ"ק אדמו"ר מוויזניץ שליט"א לרפו"ש האט פארגעליינט א מכתב קודש וואס זיין זיידע דער וויזניצער רבי האט אפגעשיקט לכבוד די מעמד.
דערנאך האט כ"ק אדמו"ר מצאנז קלויזענבורג שליט"א ממשיך געווען און צוגעענדיגט די דברות קודש, ווען דער רבי אנטשולדיגט זיך פארן ציבור איבער די עגמת נפש וואס איז געשאפן געווארן דורך אים.
