בחצר הקודש מאחנובקא בעלזא גרייט מען זיך אין די טעג צו א גרויסארטיגע מעמד הכנסת ספר תורה, פאר די ספר תורה וואס איז געשריבן געווארן דורך אלע חסידים אינאיינעם מיטן רבי'ן שליט"א, לכבודו ולזכותו פון כ"ק אדמו"ר ממאחנובקא בעלזא שליט"א.
אין די לעצטע צוויי יאר האבן הונדערטער חסידים זיך אנגעשלאסן אלס שותפים לדבר מצוה, ווען דער רבי שליט"א באגלייט פערזענליך דאס שרייבן די ספר תורה, דורך א סופר מומחה וואס דער רבי האט אויסגעקליבן פאר דעם צוועק.
די גרויסע מעמד וועט פארקומען דעם דאנערשטאג פרשת תרומה ב' אדר, א טאג נאכן שמחת החתונה פון א אייניקל ביים רבי'ן, די כלה א טאכטער פון זיין עלטסטן איידעם הגה"צ ר' יוסף מאיר מאסקאוויטש שליט"א בן כ"ק אדמו"ר ממעליץ שליט"א, מיט די חתן א אייניקל פון כ"ק אדמו"ר מביאלא ישרי לב שליט"א.
די ימי החגיגה האט זיך שוין אנגעהויבן היינט מאנטאג, ווען עס איז פארגעקומען די מעמד כתיבת האותיות פאר א געקליבענע צאל יחידי סגולה, וואס האבן געקויפט גרעסערע זכותים אינעם ספר תורה, אין בעפארברייטונג צום מעמד סיום כתיבת האותיות וואס וועט פארקומען דאנערשטאג נאכמיטאג אינעם היכל הכולל, וואס געפונט זיך אינעם בנין התלמוד תורה דחסידי מאחנובקא בעלזא אויף רחוב השל"ה.
די תהלוכה לכבודה של תורה וועט ארויסגיין נאכן סיום הכתיבה פונעם היכל הכולל, מען וועט באגלייטן אויף די גאסן פון השל"ה, ברטנורא, חזון איש, און האדמו"ר מגור, עס וועט ווערן אריינגעפירט ברוב פאר והדר צום היכל ביהמ"ד הגדול והחדש אויף די אויבערשטע שטאק, זייענדיג דאס ערשטע מאל וואס די נייע היכל ביהמ"ד וועט באנוצט ווערן ביי א עפנטליכער מעמד מיט די באטייליגונג פון פילע חסידים.
נאך די פרייליכע ריקודין וועט פארקומען די סעודה לגומרה של תורה אינאיינעם מיט די שמחת השבע ברכות פונעם רבי'נס אייניקל, אין די גרויסע שטוב בבנין ביהמ"ד הגדול מאחנובקא בעלזא, וואו עס ווערט געפראוועט די שמחות החתונות ביים רבי'ן אין הויף.
אין די יעצטיגע טעג איז ערשינען א פערזענליכע הזמנה פונעם רבי'ן שליט"א פאר אלע חסידים, וואו דער משמש בקודש ר' ישראל מיללער הי"ו שרייבט אין נאמען פון רבי'ן אז אלע חסידים זענען געלאדנט צו מיטהאלטן די גרויסע שמחה של תורה, אזוי אויך וועט בפקודת הקודש פונעם רבי'ן פארקומען א ספעציעלע סדר לימוד פאר די בחורים קומענדיגן דאנערשטאג אינדערפרי בעפאר די מעמד הכנסת ספר תורה.
