פארגאנגענעם מוצאי שבת קודש פרשת משפטים שקלים, האבן טויזענטער חסידי סקווירא איבערגעפולט דעם גיגאנטישן ביהמ"ד הגדול והחדש אין שיכון סקווירא, צו מיטהאלטן די גייסטרייכע מעמד הודאה "כינוס הרבבות", שטייענדיג גענוי א יאר זינט די גרויסע מעמד הכנסת ספר תורה וואס איז פארגעקומען פארלאפענע יאר, ווען יעצט האט מען אין א מזל'דיגע שעה געענדיגט ליינען די גאנצע תורה אין דעם נייעם מהודר'דיגן ספר תורה.
ווי באקאנט האבן אלע סקווירא חסידים זיך פאראייניגט אין דעם הייליגן פראיעקט פון "קדשינו" זיך צו מחזק זיין בעניני טעכנעלאגיע און צניעות, און דערמיט זוכה געווען צו א זכות אין דעם ספר תורה וואס איז געשריבן געווארן דורכ'ן רבי'ן און אלע חסידים אין לויף פון עטליכע יאר. מיט א יאר צוריק ביום כ"ח שבט איז געפראוועט געווארן די הכנסת ספר תורה, און אצינד לתקופת השנה ווען מ'האט פארענדיגט ליינען די גאנצע תורה, יעדעס ווארט אינעם תורה, איז געפראוועט געווארן די מעמד הודאה און סיום הקריאה, אין דעם פאסיגן מאמענט ווען די חסידים האבן זיך פון פריש מקבל געווען קבלות טובות בעניני טעכנעלאגיע און צניעות.
די גייסטרייכע מאמענטן האט זיך שוין אנגעהויבן דורכאויס שבת, ווען מען האט פאקטיש מסיים געווען די קריאה ביים ליינען שבת אינדערפרי, אין א חידוש'פולן שריט האט דער סקווירא רבי שליט"א עולה געווען אחרון צו מסיים זיין די גאנצע קריאה, אנדערש ווי געווענליך ווען דער רבי איז עולה שישי. נאכן פארענדיגן די קריאה האבן די טויזענטער חסידים אויסגעשריגן בקול רם "חזק חזק ונתחזק" גענוי ווי ביים ענדיגן ליינען די גאנצע תורה ביי חתן תורה ביום שמחת תורה.
דערנאך האט מען געזינגען פרייליכע ניגונים, און הרה"ג ר' יעקב אייזענבערגער שליט"א דומ"ץ סקווירא ב"ב האט געמאכט די ספעציעלע מי שברך, וואו דער רבי שליט"א בענטשט די אלע חסידים וואס האבן זיך מקבל געווען פרישע קבלות טובות. דערנאך האט זיך דער רבי אויפגעשטעלט מיט די ספר תורה ווען דער גאנצער ציבור הייבט זיך אין לעבעדיגע טענץ א שטיק צייט.
צו דעם גרויסן שבת האבן זיך אנגעזעהן הונדערטער געסט פון אלע שטעט און אפילו מעבר לים, די גאנצע שבת איז אריבער אויף א יום טוב'דיגע שטימונג, סיי מיט די ניגונים ביי די טישן, און אזוי אויך ביי די תפילות שבת קודש ווען עס זענען צוגעגאנגען צום עמוד די קינדער פונעם רבי'ן און די בעלי תפילה פון די הייליגע טעג.
מוצאי שבת קודש איז געווען צוגעשטעלט א ברייטע סעודת מלוה מלכה פארן גאנצן ציבור, און דערנאך איז דער רבי אריינגעקומען צום צענטראלן מעמד "כינוס הרבבות" וואו די טויזענטער חסידים האבן איבערגעפולט דעם גרויסן ביהמ"ד פון ברעג צו ברעג. א האלבע שעה האט מען געטאנצן אויף לעבעדיגע ניגוני הודאה, און דערנאך האט אויפגעטרעטן מיט א קורצע דרשה הרב יעקב יוסף שפיטצער שליט"א יושב ראש פונעם מבצע קדשינו.
דערנאך האט דעם רבינ'ס זון הגה"צ ר' יצחק טווערסקי שליט"א פארגעלערנט אינעם ספר נתיבות קודש מדברי תורתו פונעם סקווירא רבי'ן שליט"א, די שיעור פון דעם טאג כ"ח שבט לויט די סדר פון עמוד יומי וואס ווערט געלערנט דורך סקווירא חסידים, און דאן האט מען זוכה געווען צו הערן דברות קודש פונעם רבי'ן שליט"א וועלכער האט א לענגערע צייט ארומגערעדט איבער די געוואלדיגע חשיבות פון זיך שטארקן אויף נסיונות, קעמפן קעגן דעם יצר און זיין אפגעשיידט פון די אלגעמיינע גאס.
האברך החשוב ר' יהושע כף הי"ו האט געזינגען גראמען און קונצליך דערמאנט די לאנגיעריגע מערכה פונעם רבי'ן שליט"א צו קעמפן קעגן די נסיונות הדור, דערנאך האט מען אריינגעברענגט די שטרי קבלה וואו די טויזענטער חסידים האבן זיך מקבל געווען פרישע קבלות טובות בעניני טעכנעלאגיע און צניעות, מען האט צוגעברענגט צום רבי'ן די קבלות פון יעדע סקווירא שטיבל באזונדער, יעדע געגנט אינעם סקווירא שטעטל באזונדער, יעדע מנהל מיט די קבלות פון זיינע תלמידים און אזוי ווייטער, ווען דער רבי וואונטשט אן פאר יעדן באזונדער.
דער יושב ראש הרב יעקב יוסף שפיטצער הי"ו האט דערמאנט אז אין די פארגאנגענע וואך איז פארגעקומען הונדערט און צען כינוסי התחזקות אין בעפארברייטונג צום מעמד, און דערנאך האט דער רבי ווידער איבערגעגעבן ברכות קדשו לכל העם הנאספים, איידער מען האט געזאגט אינאיינעם די ספעציעלע תפילה פון מוצאי שבת וואו מען בעט זיך אויס אלעס גוטס.
דאן איז דער רבי ארויס אויף א קורצע הפסקה, און ביים צוריק ערשיינען אין ביהמ"ד האט מען איבערגעגעבן פארן רבי'ן די זעלטענע מתנה, די הייליגע ספר תורה פון הרה"ק רבי אהרן טשערנאבילער זי"ע, וואס איז נארוואס אפגעקויפט געווארן לכבודו פונעם רבי'ן לרגל די גרויסע חגיגה, דער רבי האט איבערגענומען די ספר תורה מיט א קענטיגע התרגשות און זיך ארויסגעלאזט אין פייערליכע ריקודין לכבודה של תורה. די קינדער פונעם רבי'ן האבן מקבל פנים געווען די ספר תורה מיט די פריערדיגע ספרי תורה, די קדשינו ספר תורה, די ספר תורה פון הרה"ק רבי יוחנן מראחמיסטריווקא זי"ע, און די ספר תורה פון הרה"ק מסקווירא זי"ע.
דער רבי האט געטאנצן פאר לענגערע מינוטן איינמאל און נאכאמאל, און געמאכט די ברכה פון שהחיינו אויף א נייע סטראקעס קאפטן, דערנאך האט דער רבי געטאנצן מיט זיינע קינדער, געמאכט הגבה כנהוג, ווען מיט גלילה ווערט מכובד הנגיד החסיד ר' נחום זלמן רוקח הי"ו וועלכער האט אפגעקויפט דעם ספר תורה לכבוד דעם רבי'ן. אויך האט דער רבי געטאנצן עטליכע מינוט מיט די קדשינו ספר תורה, און דערנאך איז דער גאנצער ציבור אריבער וואונטשן לחיים און א גוטע וואך ביז די פריע פארטאגס שעה'ן.
