בחצר הקודש וויזניץ איז היינט געמאלדן געווארן פאר די הונדערטער אינגעלייט חסידי וויזניץ, אז מארגן דאנערשטאג וועט פארקומען ספעציעלע זמני קבלת קהל פאר די אינגעלייט וואס האלטן אין שנה ראשונה נאך די חתונה, און זענען נאכנישט אריין אל הקודש פנימה צום רבי'ן מיט א קוויטל נאך די חתונה.
שוין לאנגע יארן וואס עס איז איינגעפירט אז נאך די חתונה גייט מען אריין מיט א קוויטל צום רבי'ן אינאיינעם מיט די בני בית, להיזכר לטובה און צו מקבל זיין ברכת קדשו ווען מען איז זוכה אויפצושטעלן א נייע אידישע שטוב, אבער ווי באקאנט איז דער רבי שליט"א נישט אזוי בקו הבריאות, און שוין איבער א יאר וואס דער רבי שליט"א וויילט אינדרויסן פון שיכון וויזניץ ב"ב לצרכי רפואה ומנוחה, וואס באדייט אז די חסידים האבן נישט קיין געהעריגע געלעגנהייט אריינצוגיין אל הקודש פנימה מיט א קוויטל, סיידן אין ספעציעלע זמנים ווי פאר די ימים טובים און יארצייטן וואס דער רבי נעמט אויף הונדערטער חסידים אויף אמאל.
אצינד איז געמאלדן געווארן אז דער רבי שליט"א וועט אריינקומען קיין בני ברק ספעציעל צו אויפנעמען די אינגע אינגעלייט פון שנה ראשונה, די וואס האבן חתונה געהאט אין די לעצטע יאר צייט און האבן נאכנישט געהאט די געלעגנהייט אריינצוגיין מיט א קוויטל אינאיינעם מיט די בני בית, די זמני קבלת קהל וועט פארקומען מארגן דאנערשטאג נאכמיטאג אין זאל פון בית וויזניץ אין שיכון וויזניץ בני ברק, צוערשט פאר די אינגעלייט וואס זייער נאמען הייבט זיך אן מיט די אותיות פון א' ביז כ', און ביי א קומענדיגע געלעגנהייט וועלן די אנדערע אינגעלייט קענען אריינגיין אל הקודש פנימה.
