לכבוד די שמחה במעונו פונעם באקאנטן עסקן ר' משה מארגערעטען הי"ו, מייסד ויו"ר אירגון צדק ארויסצוהעלפן אסירי ישראל אויף אלע פראנטן, האט כ"ק אדמו"ר ממונקאטש שליט"א אפגעראכטן א ספעציעלע שבע ברכות במעון קדשו לכבוד די שמחה, ארויסצוצייגן שעצונג און עהרע פאר די פילע לייסטונגען פון ר' משה לטובת הכלל והפרט.
דער מונקאטשער רבי שליט"א איז שוין צענדליגע יארן אריינגעטון בעובי הקורה ארויסצוהעלפן אידישע קינדער אויפן פראנט פון עסקנות און שתדלנות, סיי בעניני רפואה און איבערהויפט אין רעגירונגס אנגעלעגנהייטן, דער רבי שליט"א באגלייט פונדערנאנט די ווייטגרייכנדע פעולות פון די צדק ארגענעזאציע און האלט אן א נאנטע קשר מיטן הויפט עסקן ר' משה אויף טריט און שריט.
צום שבע ברכות וואס איז פארגעקומען בביתו נאוה קודש פונעם מונקאטשער רבי'ן שליט"א אין בארא פארק, זענען געלאדנט געווארן א צאל פראמינענטע לויערס אין דעם געביט פון פדיון שבוים, כאות הוקרה פאר זייער שטענדיגע הילף ארויסצוהעלפן אסירי ישראל, אזוי אויך האבן זיך באטייליגט א רייע גדולי ישראל, כ"ק אדמו"ר מבאבוב 45 שליט"א, כ"ק אדמו"ר מראחמיסטריווקא שליט"א, כ"ק אדמו"ר מליסקא שליט"א, הגה"צ ר' חיים דוד כ"ץ שליט"א דומ"ץ סאטמאר ב"פ, הגה"צ ר' יעקב בער טייטלבוים שליט"א אב"ד סיגעט און נאך.
דער מונקאטשער רבי האט אויפגעטרעטן מיט דברות קודש, ווען אינצווישן האט דער רבי געווידמעט עטליכע שורות אויף די ענגלישע שפראך ארויסצוהייבן די געטריישאפט פון די אנוועזנדע לויערס, דער בעל שמחה ר' משה האט אויפגעטרעטן מיט דברי שבח והודאה, און נאך דרשות זענען געהערט געווארן דורך הגה"צ אב"ד סיגעט, העסקן ר' אנשיל שווארץ הי"ו, און העסקן ר' יעקב ווייס הי"ו, צום שלוס האט מען זיך ארויסגעלאזט אין פרייליכע ריקודין לכבוד די שמחה.
