אין קהילה קדושה נצח ישראל סקולען אין וויליאמסבורג גרייט מען זיך צו א גרויסע מעמד הכנסת ספר תורה, פאר די ספר תורה וואס מען האט אנגעהויבן שרייבן לזכותו פון כ"ק אדמו"ר הרה"ק מסקולען זצ"ל בהלו נרו עלי אדמות, און נאכן הסתלקות האט מען עס ממשיך געווען לזכר נשמתו הטהורה פונעם רבי'ן זצ"ל.
גענוי א חודש בעפאר די הסתלקות ה' אלול תשפ"ד, האט מען אנגעהויבן צו שרייבן די ספר תורה לזכותו פונעם רבי'ן זצ"ל, כ"ק אדמו"ר ממונקאטש שליט"א וועלכער איז געווען שטארק אקטיוו צו באגלייטן דעם רבינ'ס געזונט צושטאנד, האט אנגעהויבן שרייבן די ספר תורה בביתו נאוה קודש, זיך אליין משתתף געווען מיט די ערשטע סכום און געבעטן נאך אידן אנטייל צו נעמען דערין, עס זאל זיין א זכות פאר א רפואה, ליידער איז דער רבי נסתלק געווארן א קורצע צייט שפעטער לדאבון לב כל בית ישראל, און די עסקני הקהילה האבן פארגעזעצט דעם אונטערנעמונג צו פארענדיגן די ספר תורה לזכר נשמתו הטהורה פונעם רבי'ן, כ"ק מרן הרה"ק רבי ישעי' יעקב בן הרה"ק רבי ישראל אברהם ז"ל.
אצינד ווען מ'האט זוכה געווען לברך על המוגמר, איז באשטעטיגט געווארן די פלענער פארן גרויסן מעמד הכנסת ספר תורה וואס וועט פארקומען בצל הקודש פון בנו הצעיר כ"ק אדמו"ר מישועת יעקב סקולען שליט"א, בבית מדרשו קהל נצח ישראל סקולען, דער מקום קדוש וואו דער רבי זצ"ל און אבותיו הקדושים האבן אפגעראכטן די עבודת הקודש רבות בשנים און משפיע געווען פאר אידישע קינדער מהוד תורתם וצדקתם.
די מעמד סיום כתיבת אותיות וועט פארקומען ביום ראש חודש ניסן דאנערשטאג פרשת ויקרא הבעל"ט, בביתו נאוה קודש פונעם רבי'ן זצ"ל אין בארא פארק, און זונטאג דערויף ביום ד' ניסן וועט פארקומען די מעמד הכנסת ספר תורה צום סקולענער בית המדרש קהל נצח ישראל אויף קיעפ סטריט אין וויליאמסבורג, אין שפיץ פון כ"ק האדמורי"ם שליט"א לבית סקולען, נאכגעפאלגט מיט די סעודת מצוה אין זאל פון ויואל משה.
