מיט איבערגיסנדע הערצער פון שבח והודאה טוען טויזענטער חסידי סקווירא ערהאלטן אצינד די פריידיגע בשורה, אז נאך לענגערע הארעוואניע און שתדלנות האט מען זוכה געווען צו ערהאלטן די לאנג ערווארטעטע פערמיטן זיך צו קענען אריינציען אין די נייע שטעטל "קרית סקווירא" אין בעטהעל, אין אפסטעיט ניו יארק.
ווי ברייט באקאנט האט כ"ק אדמו"ר מסקווירא שליט"א אונטערגענומען א מאסיווע אונטערנעמונג מיט עטליכע יאר צוריק, אויפצובויען א שפאגל נייע ישוב אין אפסטעיט ניו יארק, וואו צו קענען ווייטער פארשפרייטן די גבולי הקדושה, א נייע ישוב וואס זאל זיין געבויעט אויף די פעסטע יסודות און דרך המסורה, נאכצוקומען די פארלאנג פון אלפי חסידי סקווירא וואס זוכן צו וואוינען צווישן היימישע אידן חסידי סקווירא, ווען דער יעצטיגער שטעטל איז שוין לאנג אויסגעוואקסן איר געברויך.
עטליכע יאר גייט שוין אן די בוי ארבעט אין פולן שוואונג, ווען מיט א האלבע יאר צוריק איז שוין געפראוועט געווארן די שבת חנוכת הקריה, ווען צענדליגע הייזער שטייען שוין גרייט אריינצונעמען די פרישע איינוואוינער אין א מזל'דיגע שעה.
ליידער האט מען זיך געמוטשעט די לעצטערע חדשים צו קענען ערהאלטן די נויטיגע פערמיטן, אין די צייט וואס מען האט פרובירט צו שתדל'ן אויף אלע פראנטן. היינט מאנטאג איז ב"ה אנגעקומען די גוטע בשורה אז די סי או'ס פון די נייע הייזער זענען אנגעקומען אין א מזל'דיגע שעה, און איז באשטעטיגט געווארן דורך די הויכראנגיגע באאמטע, וואס באדייט אז מען קען זיך שוין אריינציען אין די נייע שטעטל לקראת יום טוב פסח.
בהוראת הקודש פון כ"ק אדמו"ר מסקווירא שליט"א וועלן זיך די ערשטע תושבי הקריה אריינציען פרייטאג פרשת צו ערב שבת הגדול ביום ט' ניסן, שטייענדיג הארט בעפאר יו"ט פסח וואס וועט שוין געפראוועט ווערן בתוככי הקריה מיט גרויס שמחה ורגשי שבח והודאה.
