בחצר הקודש סאטמאר ווערט היינט געמאלדן די פלענער פאר א גרויסע מעמד וואס וועט בעז"ה פארקומען דעם קומענדיגן חול המועד פסח, ווען כ"ק אדמו"ר מסאטמאר שליט"א וועט מקיים זיין די מצוה רבה ונשגבה פון "מסירת מתנות כהונה", באגלייט מיט א אייגענארטיגע מעמד "הפייסות", אויסצוקלויבן א כהן וואס זאל מקבל זיין די מתנות כהונה, גענוי ווי עס איז פארגעקומען בזמן שבית המקדש היה קיים.
די מעמד איז באשטימט אויף מאנטאג די דריטע טאג חול המועד, און וועט אפגעראכטן ווערן בהיכל ביהמ"ד הגדול אין קרית יואל, וואס וועט ווערן אויסגעשטעלט מיט די מאקסימום פלעצער צו קענען אקאמאדירן טויזענטער חסידים וואס זענען ערווארטעט מיטצוהאלטן די זעלטענע מאמענטן.
גענוי ווי עס איז געווען איינגעפירט אין בית המקדש, אז מען האט אויסגעקליבן א כהן דורך א גורל, וועט ביי דעם מעמד פארקומען א ספעציעלער גורל וואו מען וועט אויסקלויבן צוויי כהנים דורך די פייסות, די גורל וועט ווערן אפגעראכטן צווישן די סאטמארער כהנים לומדי תורה בטהרה אין די סאטמארער כוללים נעץ, און די עלטערע כהנים חברי חבורת אהבת קדומים די פני העדה, איין גורל צווישן די כולל אינגעלייט, און איין גורל צווישן די עלטערע כהנים, און ביידע אויסדערוועלטע כהנים וועלן האבן די זכיה צו באקומען פונעם רבי'ן די מתנות כהונה.
דאס קומט נאך צוויי ענליכע מעמדים וואס איז שוין פארגעקומען די לעצטע פאר יאר בחצר הקודש סאטמאר, מעמד ראשית הגז און מעמד פדיון פטר חמור, וואס האט פאראייניגט טויזענטער חסידים אין שפיץ פונעם רבי'ן מקיים צו זיין די זעלטענע מצוה בהידור רב און חביבות המצוות.
