א היסטאריש פלאץ אין ירושלים עיה"ק גייט אריבער א רענאוואציע פראיעקט אין די יעצטיגע טעג, ביתו נאוה קודש פון הרה"ק רבי שלמה'קע זוועהילער זי"ע אויף די ראפאפארט גאס, וואס ווערט איבערגעבויעט אויפן דאך און די בוידעם.
ווי באקאנט האט הרה"ק רבי שלמה'קע זוועהילער זי"ע געבויעט זיין הויז מיט די אייגענע הענט, עס באפעסטיגט מיט קדושה וטהרה און גרויס הארעוואניע. דער צדיק האט דאס געבויעט מיט בלויזע האלץ און לייכטע בוי מאטריאל, אן קיין שום אייזן אדער ענליכע סטרוקטורן.
די הייליג הויז שטייט נאך ביזן היינטיגן טאג, און אויסער די צענטראלע שטאק וואו עס געפונט זיך די הייליגע צימערן וואו הרה"ק רבי שלמה'קע זי"ע האט געפראוועט די עבודת הקודש, און דינט נאך ביז היינט אלס אכסניא של תורה ותפילה פאר שיעורי תורה און מוסדות התורה, איז אויך פארהאן א קליינע בוידעם מיט א דעכל דערויף, און אט דאס ווערט יעצט איבערגעבויעט צו קענען איבערקומען עקסטרעמע וועטערס און נאך וויכטיגע איינריכטונגען וואס פעלט זיך אויס אויפצוהאלטן דעם מקום קדוש.
