אלפי חסידי גור זענען איבערראשט געווארן היינטיגן טאג, ווען עס איז ערשינען א מכתב קודש פון כ"ק אדמו"ר מגור שליט"א, צו מחזק זיין די טויזענטער חסידים איבער די גארער וועלט, און בפרט די חסידים פון שטאט ערד אין ארץ ישראל, וואס האבן ליידער בייגעוואוינט א שווערע איבערלעבעניש מיט די מיסיל אטאקע פארלאפענע וואך, און געפונען זיך נאך ליידער פארוואגלט אן קיין אייגענע שטוב.
טראץ וואס אין גור איז דאס א זעלטנהייט, האט דער רבי שליט"א אפגעשיקט דעם ספעציעלן חיזוק בריוו אונטערגעשריבן בכתב יד קדשו, וואו דער רבי טוט וואונטשן אנשי שלומו היקרים צום פרייליכן יו"ט פסח, אתכם ואת כל אשר עמכם, א כשר'ן און פרייליכן יום טוב און אלעס גוטס.
דער רבי ערווענט די גרויסע חסדים וואס מ'זעהט אין די יעצטיגע טעג, אבער מיט דעם אלעם זענען אידישע קינדער אין צער און ענגשאפט, מיט א וואונטש אז יעדער זאל האבן א פרייליכן יום טוב, והשיאנו ה' אלקינו את ברכת מועדיך לחיים ולשלום לשמחה ולששון.
דער רבי שרייבט ווייטער איבער די חסידישע מאמרים אז בכח חוקת הפסח איז מסוגל אריינצובאקן תמימות בלב, און מקבל זיין דעם אויבערשטנס הנהגה בשמחה, טראץ וואס מען פארשטייט נישט דעם אויבערשטנס חשבונות. בזכות פון זמן חירותנו זאל מען זוכה זיין צו א פולקאמע פרייהייט פון צער און שוועריקייטן פחד און בהלה, ישועה והצלחה אין אלע ענינים מתוך שלוה ומנוחה, און דער רבי שרייבט אונטער די ווערטער "ידידכם אוהבכם".
