מיט גרויס צער איז היינט געווארן אויפגענומען די שווערע בשורה, איבער די פטירה בשיבה טובה פון הגאון החסיד המפורסם רבי נפתלי לעבאוויטש ז"ל, דער לעגענדארער תורה שרייבער ביי הרה"ק מסאטמאר זי"ע, און א אייניקל פון צדיקים וקדושים ממשפחת רבנים מפורסמים.
הרב החסיד ר' נפתלי איז געווען א זון פון הרב החסיד ר' ברוך יהודה לעבאוויטש זצ"ל שו"ב אין שטאט האלאש, און א אייניקל פונעם טשאבא רב הגה"צ רבי שרגא שמואל שניטצלער זצ"ל. ער איז געבוירן געווארן נאך אין דער אלטער היים אין אונגארן, און איז ארויסגעקומען קיין אמעריקע אין זיינע יונגע יארן וואו ער האט זיך מקשר געווען בכל נימי נפשו צו מורו ורבו הרה"ק מסאטמאר זי"ע.
דורכאויס זיינע בחור'ישע יארן האט ער זוכה געווען צו משמש זיין דעם סאטמארער רבי'ן לפני ולפנים אלס הויז בחור, און דער רבי זי"ע האט אים באאויפטראגט מיט די עבודת הקודש פון שרייבן זיינע תורות און חידושים, א עבודה וואס ער האט אנגענומען מיט א געוואלדיגע ערנסטקייט און פאר צענדליגע יארן זוכה געווען צו מוציא זיין לאור עולם די לעכטיגע ספרים און חידושי תורה.
ר' נפתלי איז געווען אן איש מורם מעם, א חסידישער איד אויף וועם טויזענטער סאטמארער חסידים האבן ארויפגעקוקט און געשעצט זיין פערזענליכקייט, ליידער איז ער נישט געזונט געווען די לעצטע תקופה, און היינט אינדערפרי איז ער נפטר געווארן לחיי העולם הבא, בשיבה טובה אין עלטער פון איין און ניינציג יאר, איבערלאזנדיג א הערליכע דור ישרים יבורך, ווען צווישן זיינע חשובע געשוויסטער ציילט זיך זיין ברודער כ"ק אדמו"ר מניקלשבורג שליט"א.
די לוויה איז פארגעקומען היינט פארמיטאג ביי ביהמ"ד דושינסקיא אין וויליאמסבורג, אויפן וועג קיין מאנסי וואו די לוויה קומט פאר יעצט מיטאג ביי ביהמ"ד ניקלשבורג, דערנאך וועט ער קומען לקבורה אויפן בית החיים אין קרית יואל.
יהא זכרו ברוך.
