בחצר הקודש סאטמאר ווערט געמאלדן די טעג איבער א גרויסער מעמד התמנות וואס וועט פארקומען בעז"ה דעם חול המועד פסח, ווען עס וועלן ווערן אויפגענומען פרישע חברי ביד"ץ אין די סאטמארער בית דין, צו שטיין על המשמר אויף די קהילה קדושה אין אלע רוחניות'דיגע אנגעלעגנהייטן.
אין צוגאב צו די לאנגיעריגע חברי הביד"ץ, הגה"צ ר' שלמה לייב וויינבערגער שליט"א אבד"ק פאיע, הגה"צ ר' זלמן לייב פילאפף שליט"א אבד"ק מכלל יופי, און הגה"צ ר' חיים דוד כ"ץ שליט"א דומ"ץ סאטמאר ב"פ, ווערן אצינד אויפגענומען נאך צוויי חברי ביד"ץ, הגה"צ ר' לייבוש פריעדמאן שליט"א דומ"ץ ביהמ"ד הגדול ד'סאטמאר אין וויליאמסבורג, און הגה"צ ר' ארי' ראזענפעלד שליט"א דומ"ץ סאטמאר קרית יואל.
די מעמד התמנות וועט פארקומען דעם מאנטאג חול המועד פסח, ביים יערליכן אסיפה כללית אין ביהמ"ד הגדול דקהל יטב לב ד'סאטמאר אויף ראדני סטריט אין וויליאמסבורג, וואו כ"ק אדמו"ר מסאטמאר שליט"א וועט משמיע זיין דעם דבר ה' ברמה און מכתיר זיין די דיינים אויף זייער נייעם פאסטן, לחזק עמוד ההוראה אין די קהילה.
