מטעם בית כ"ק אדמו"ר מוויזניץ שליט"א לרפו"ש איז געמאלדן געווארן אז אנדערש ווי געפלאנט וועט דער רבי שליט"א נישט אריינקומען היינט אין ביהמ"ד הגדול אויף תפילת מעריב און קבלת קהל לרגל האי יומא רבא ו' אייר, נאך וואס דער רבי שליט"א מוטשעט זיך מיט א אנטצינדונג ל"ע און איז ערנסט אפגעשוואכט.
נעכטן איז געמאלדן געווארן פון די גבאים אז לכבוד דעם רבינ'ס יום הולדת ביום ו' אייר, ווען פילע חסידים ווילן זיך מזכיר זיין ביים רבי'ן בהאי יומא רבא, וועט פארקומען ספעציעלע זמני קבלת קהל אינעם זאל בבנין בית וויזניץ, וואו די חסידים וועלן קענען אריבערגיין ביים רבי'ן וואונטשן אריכת ימים ושנים טובים, און מקבל זיין מברכותיו הטהורות אין דעם יום המסוגל.
ליידער איז דער רבי אבער שטארק אפגעשוואכט די טעג צוליב א אנטצינדונג, און טראץ וואס עס ווערט גוט באהאנדלט ב"ה איז דער רבי אבער גאר שטארק אפגעשוואכט דערפון, דעריבער זענען די פלענער געווארן אפגערופן.
אין די זעלבע צייט וועלן חסידי וויזניץ די בכל אתר ואתר אויסנוצן דעם יום המסוגל ו' אייר צו מתפלל זיין און מעורר זיין רחמי שמים לרפואתו השלימה פונעם רבי'ן, און א ספעציעלע מודעה איז געווארן ארויסגעשטעלט אז די אלע חסידים וואס וועלן מסיים זיין גאנץ ספר תהלים דורכאויס דעם רבינ'ס יום הולדת ו' אייר, לזכותו ולרפואתו פונעם רבי'ן, וועלן ווערן אריינגעשריבן אין א ספעציעלע כוללות קוויטל וואס וועט ווערן איבערגעגעבן פארן רבי'ן להיזכר לטובה.
