יעצט ביינאכט אין ארץ ישראל איז ערשינען די פלענער איבער די גרויסארטיגע מעמד ההדלקה בליל ל"ג בעומר, דורך הגה"צ המשפיע ר' אלימלך בידערמאן שליט"א, אז אנדערש ווי יעדעס יאר וועט די מעמד ההדלקה פארקומען בפלטרין של מלך אין ירושלים עיה"ק, ביים ווינקל פון רחוב ירמיהו און רחוב שמגר.
דאס קומט נאכדעם וואס די מדינת ישראל אינסטאנצן האבן פארעפנטליכט די פלענער אין די יעצטיגע טעג אפצושליסן אתרא קדישא מירון אויף ל"ג בעומר, טראץ וואס עס איז נאכנישט געמאלדן געווארן א ענדגילטיגע באשלוס דערויף, זעט אבער שטארק אויס אז אין מירון וועט מען דאס יאר נישט קענען פראווענען קיין גרויסע הדלקות מיטן די באטייליגונג פון א גרעסערע ציבור אידן.
אצינד איז באשלאסן געווארן דורך די מארגני ההדלקה, אז דאס יאר וועט הגה"צ המשפיע ר' אלימלך בידערמאן שליט"א אנצינדן די מדורה אין ירושלים עיה"ק, וואו עס איז ערווארטעט א ציבור עצום פון צענדליגע טויזענטער אידן פון איבער גאנץ ארץ ישראל און חוץ לארץ. מיט א קליינע שאנס אז אויב וועט מען קענען פראווענען א פולקאמע גרויסע הדלקה אין אתרא קדישא מירון וועט די הדלקה יא פארקומען אין מירון.
