חסידי ומעריצי בית קאפיטשניץ גרייטן זיך אויף א געהויבענער שבת התוועדות והתעלות וואס וועט פארקומען דעם שבת קודש פרשת בהר בחוקותי, ווען עס וועט געפראוועט ווערן די מעמד הכנסת ספרי התורה אויף די היסטארישע ספרי תורה פון צדיקי בית סאדיגורא, וואס כ"ק אדמו"ר מקאפיטשניץ שליט"א גיבט אריין אצינד לבית מדרשו אין די עזרת תורה געגנט אין ירושלים.
די רעדע איז פון א ספר תורה וואס שטאמט פון הרה"ק רבי אברהם יעקב האדמו"ר הזקן מסאדיגורא זי"ע, און א ספר תורה וואס האט באלאנגט פאר מחברתו הטהורה הרבנית הצדיקת ע"ה, טאכטער פון הרה"ק בעל בית אהרן מקארלין זי"ע. די ספרי תורה זענען אריבער בירושה און געפונט זיך באוצרו הטוב פונעם רבי'ן, און נאך וואס עס איז נישט געווען כשר האט דער רבי שליט"א אונטערגענומען א ערנסטן פראיעקט צו איבערפרישן די ספרי תורה בדמים תרתי משמע.
נאכן פארענדיגן די איבערפרישונג פון די ספרי תורה, איז מיט עטליכע חדשים צוריק פארגעקומען א מעמד סיום כתיבת האותיות אין שפיץ פונעם רבי'ן, אינאיינעם מיט די נגידים ותומכים וואס האבן אויסגעצאלט די אסטראנאמישע קאסטן, און אצינד גרייט מען זיך צום גרויסן חגיגת הכנסת ספרי התורה וואס איז באשטימט אויף דעם שבת פרשת בהר בחוקותי, ביום ל"ז בעומר, די יארצייט פון הרה"ק האדמו"ר הזקן מהוסיאטין זי"ע.
צוליב דעם גרויסן ציבור חסידים ומעריצים וואס זענען ערווארטעט מיטצוהאלטן דעם גרויסן שבת, איז אויפגעשטעלט געווארן א גרויסע שאטער פארנט פון ביהמ"ד קאפיטשניץ אין ירושלים, וואו עס וועט אפגעראכטן ווערן די תפילות און טישן דורכאויס שבת, און די פרייליכע ריקודין לכבוד התורה שבת אינדערפרי נאך תפילת שחרית. אין א ספעציעלע מכתב קודש טוט דער רבי שליט"א איינלאדענען אלע חסידים אויף שבת און זיך מיטפרייען מיט די גרויסע דערגרייכונג.
