פארגאנגענעם דינסטאג ביום ל"ג בעומר האבן אלפי תלמידי וחסידי סאטמאר שווארץ געמאכט די גאסן פון וויליאמסבורג המעטירה, זיך פארזאמלענדיג אפצוגעבן דעם כבוד התורה ביים היסטארישן חגיגת הכנסת ספר תורה, די תהלוכה איז ארויס מביתו נאוה קודש פון הרה"ק מסאטמאר זי"ע אויף בעדפארד עוועניו, עס איז אדורך די וויליאמסבורגע גאסן פון בעדפארד, טעילאר, ליע עוועניו און ראדני סטריט, ווען דורכאויס לאנגע שעות נאכאנאנד האבן די טויזענטער חסידים זיך מיטגעפריידט מיטן רבינ'ס שמחה ושמחת התורה.
פיר דרייסיג נאכמיטאג איז כ"ק אדמו"ר מסאטמאר שליט"א אנגעקומען צום מקום קדוש אויף 500 בעדפארד, באותו מקום וואו הרה"ק מסאטמאר זי"ע האט אפגעראכטן די עבודת הקודש רבות בשנים, צוערשט איז פארגעקומען א מסיבת לחיים אינאיינעם מיט די משפחת המלוכה און די נאנטע מקורבים. דער רבי האט פארברענגט מיט די זקני החסידים וועלכע האבן דערציילט רייכע זכרונות פון די הייליגע עבודה פונעם סאטמארער רבי'ן זי"ע דא אין דעם הויז.
פינף אזייגער נאכמיטאג האט דער רבי ארויסגעפירט דעם ספר תורה צו די גאס, און דעם רבינ'ס ברודער הגה"צ אבד"ק זענטא שליט"א האט באגלייט די נייע ספר תורה מיט די היסטארישע ירושה ספר תורה פון הרה"ק מצאנז זי"ע בעל דברי חיים. דער רבי האט צוגעשפאנט מיטן ספר תורה צום בימת הכבוד אויף טעילאר סטריט וואו עס זענען געווען אויסגעשורה'ט די צענדליגע טויזענטער ילדי הת"ת פון אמעריקא און קאנאדא, אויף די הויכשטאקיגע פארענטשעס לענגאויס די גאס. מען האט געזינגען פרייליכע ניגונים א שטיק צייט, און די מנהלי הת"ת האבן איבערגעגעבן פארן רבי'ן א כוללות קוויטל, א מנחת ביכורים מיט טויזענטער שעות רצופות וואס די קינדער און בחורים האבן געלערנט כהכנה דרבה צום גרויסן חגיגה לכבודה של תורה.
מען האט געזינגען ווארעמע ניגוני תורה והודאה, און הרה"ג ר' יואל שווארץ שליט"א מנהל אין תלמוד תורה האט אויפגעטרעטן מיט קורצע ווערטער בגודל קדושת המעמד. צוויי קינדער האבן פארגעזינגען גראמען, און דער רבי האט אויפגעטרעטן מיט קורצע דברות קודש זייענדיג גאר שטארק מרוגש.
דער רבי האט זיך ארויסגעלאזט אין פייערליכע ריקודין ברחובה של עיר, און דאן ארויף אויפן ספעציעלן מלכות'דיגן קארעטע וואס איז געווארן צוגעגרייט בכבוד והוד. טויזענטער אידן האבן דאן באגלייט די ספר תורה מיט פרייליכע ריקודים לענגאויס די גאסן, ביז מען האט דערגרייכט בית מדרשו של רבי, ביהמ"ד הגדול דקהל יטב לב אויף ראדני סטריט וואס איז מקודש בקדושה של מעלה שוין איבער א יובל יארן כולן שוין לטובה.
נאך א קורצע הפסקה ווען די טויזענטער חסידים פולן איבער דעם גאנצן היכל ביהמ"ד מקצה אל קצה, אין צוגאב צו נאך טויזענטער חסידים וואס זענען פארבליבן אינדרויסן צוליב מאנגל אין פלאץ, איז דער רבי ערשינען אינעם היכל ביהמ"ד און אנגעהויבן די ריקודין קדישין לכבוד התורה. דער רבי האט געטאנצן גאר לאנג מיט א אויסטערלישע לעבעדיגקייט אן אויפהער, אויף די אויסגעווייקטע מקובל'דיגע ניגונים פון אמאל.
דאן האט דער רבי מכבד געווען די חשובע רבנים ופני העדה צו טאנצן מיטן ספר תורה ווען דער רבי טאנצט מיט אינאיינעם, דער רבי האט פארגעזאגט די מזמורים כנהוג, ווידער געטאנצן מיטן ספר תורה אויפן ניגון שאו שערים ראשיכם, און אריינגעלייגט די ספר תורה אינעם ארון הקודש.
נאכן גרויסן מעמד ווען דער ציבור האלפים איז זיך צוגאנגען מלא התרגשות והתרוממות הנפש, איז פארגעקומען די סעודה לגומרה של תורה אין זאל פון עדן לאנדא, מיט די באטייליגונג פון די נאנטע מקורבים און די בני משפחת המלוכה.
דאנערשטאג אינדערפרי איז ווידער פארגעקומען א געהויבענע מעמד נאכפאלגענדיג די גרויסע הכנסת ספר תורה, ווען מען האט צום ערשטן מאל ארויסגענומען די נייע ספר תורה פונעם רבי'ן פאר קריאת התורה, ביים רבינ'ס קביעות'דיגער מנין אין גרויסן ביהמ"ד, וואס איז געווען איבערגעפולט מיט הונדערטער מתפללים וואס זענען געקומען מיטלעבן די געהויבענע מאמענטן.
די עליות און כיבודים זענען פארקויפט געווארן פאר גרויסע סכומים, אין שטיצע פון די כולל בוקר וואס גייט אן אין ביהמ"ד הגדול מדי יום ביומו באשמורת הבוקר. פתיחת הארון האט הנגיד החסיד ר' יונתן בלייער הי"ו געקויפט פאר הגה"צ ר' ליפא טייטלבוים שליט"א זון פונעם רבי'ן, און די זכות קריאת התורה האט געקויפט הנגיד החסיד ר' שלמה יודא מאשקאוויטש הי"ו פארן בעל קורא דעם רבינ'ס זון הגה"צ ר' יואל טייטלבוים שליט"א.
כהן האט עולה געווען הרב החסיד ר' מאיר ראטה הי"ו, לוי האט עולה געווען הרב החסיד ר' ישעי' קרויס הי"ו, און שלישי האט דער רבי שליט"א עולה געווען בהתלהבות עצומה, געקויפט דורך הנגיד החסיד ר' בעריש בערגער הי"ו ראה"ק סאטמאר לאנדאן.
מיט הגבה איז מכובד געווארן בנו הגדול פונעם רבי'ן הגה"צ אבד"ק סאטמאר ירושלים שליט"א, געקויפט דורך הנגיד החסיד ר' שמואל ישעי' פריעדמאן הי"ו, און גלילה האט געקויפט הנגיד החסיד ר' משה גאלדבערגער הי"ו, פאר הרב החסיד ר' יואל היימאן הי"ו פון די חשובע לומדים אין כולל בוקר.
נאכן דאווענען איז פארגעקומען א שיינע מסיבת לחיים לרגל המאורע, וואו עס האט אויפגעטרעטן הרה"ג ר' הערשל לויפער שליט"א מו"ץ בק"ק סאטמאר, דערנאך האט דער רבי שליט"א געוואונטשן לחיים און משמיע געווען דברות קודש.
