אידישע קינדער בכל מקומות מושבותיהם באוויינען די שווערע פארלוסט וואס האט זיך געשאפן היינט, מיט די פטירה בשיבה טובה פון הגאון הגדול רבי דוד מיכאל שמידל זצ"ל, מגדולי רבני ישוב הישן בארץ הקודש, און לאנגיעריגער יושב ראש פון אגודת "אתרא קדישא" אפצוהיטן בתי חיים אין ארץ ישראל מיט א זעלטענע מסירת נפש.
הגאון הגדול רבי דוד איז געווען אן איינציגער זון צו זיין פאטער הרב ר' פנחס שמידל ז"ל, געבוירן איז ער אין שטאט וויען אין עסטרייך, און אלס קליין קינד זענען זיי ארויפגעקומען קיין ארץ ישראל וואו ר' דוד איז אריין לערנען אין די סלאבאדקע ישיבה. אין זיינע יונגע יארן האט זיך אסאך געדרייט בצילא קדישא פונעם הייליגן חזון איש זי"ע, און ער איז געווען א גאר נאנטער תלמיד ביים הייליגן בריסקער רב זי"ע פון וועמענס תורה און פסקי הלכה ער האט זיך נישט אוועקגערירט כל ימי חייו.
צענדליגע יארן איז ער געשטאנען על המשמר אפצוהיטן אידישע בתי עלמין אין ארץ ישראל, בשליחות הקודש פונעם בריסקער רב זי"ע וועלכער האט אים באאויפטראגט מיט די עבודת הקודש. ער פלעגט זיך שלאגן מיט לאקאלע באאמטע און הויכראנגיגע שישקעס, און מיט א זעלטענע נשיאות חן און סייעתא דשמיא האט ער באוויזן אפצוהאלטן פילע גראבונגען אויף קברי ישראל דורכאויס די יארן.
אזוי אויך איז ר' דוד געווען שטארק אקטיוו צו לוחם זיין קעגן ניתוחי מתים דורכאויס די יארן, און פון איבער די גאנצע וועלט האט מען זיך שואל עצה געווען מיט אים צו הערן וויאזוי צוצוגיין צו אזעלכע האקעלע ארבעט אפצוהיטן כבוד המתים אויף יעדן מעגליכקייט.
אויסער דעם איז הגאון ר' דוד געווען א גרויסער מרביץ תורה, שטייענדיג אין שפיץ פון עטליכע כוללים, בפרט א כולל אין טבריה וואו ער איז געשטאנען בראש און מדריך געווען די חשובע אינגעלייט בתורה ויראת שמים. אזוי אויך האט ער מייסד געווען א כולל אין קוממיות, און עוסק געווען ארויסצוגעבן ספרי קודש לאור עולם מזכה צו זיין אידישע קינדער בתורה ויראה.
נאך א לענגערע קראנקהייט די לעצטערע חדשים, איז ר' דוד היינט פלוצלינג נפטר געווארן זייענדיג אין זיין שטוב אין בני ברק, אין טיפן עלטער פון צוויי און ניינציג יאר, די לוויה קומט פאר יעצט נאכמיטאג ביים כולל חזון איש אין בני ברק, פון דארט וועט די לוויה געפירט ווערן קיין ירושלים עיה"ק וואו טויזענטער אידן זענען ערווארטעט ארויסצוקומען ברחובה של עיר אפצוגעבן דעם כבוד האחרון, אויפן וועג קיין הר הזיתים וואו ער וועט קומען לקבורה.
ציון במר תבכה, וירושלים תתן קולה.
