הונדערטער סאטמארער נדיבים ותומכים גרייטן זיך אצינד ארויסצופארן אויף א ערשטמאליגע מסע הקודש "בוני המלוכה" אין שפיץ פון כ"ק אדמו"ר מסאטמאר שליט"א, וועלכער נעמט אונטער די נסיעה צו די מקומות הקדושים אין אייראפע, כאות הוקרה פאר די געטרייע נדיבים ותומכים "בוני המלוכה", וואס העלפן דעם רבי'ן אויפצובויען די בניני הקהילה אין קרית יואל.
די מסע הקודש איז געווידמעט פאר די נדיבי לב, וואס געבן האבן זיך אנגעשלאסן מיטן ריזן סכום פון א האלבע מיליאן דאללער צו פינאנצירן דעם מאסיוון פראיעקט מיט די נייע בית המדרש הגדול והחדש דקהל יטב לב ד'סאטמאר אין קרית יואל, וואס בליהט און שיינט בליעה"ר מיט יעדע פארבייגייענדע טאג, מיט פרישע איינריכטונגען לטובת די טויזענטער מתפללי בית המדרש וחברי הקהילה.
צוויי טשארטער פליגערס זענען געווארן ארויסגעדינגען צו אפרייזן די איבער פיר הונדערט נדיבי לב צו די געהויבענע נסיעה, די פליגערס וועלן ארויספארן פון די סטוארט לופטפעלד אין אפסטעיט ניו יארק דעם מיטוואך נאכמיטאג, און גרייכן די לופטפעלד אין שטאט סאטמאר אין ראמעניע דאנערשטאג במדבר אינדערפרי.
דעם מיטוואך אינדערפרי וועט כ"ק אדמו"ר מסאטמאר שליט"א מופיע זיין אין ביהמ"ד הגדול "היכל אלטר יחזקאל" אין קרית יואל אויף תפילת שחרית, און נאכן דאווענען וועט פארקומען א גרויסע מעמד צאתכם לשלום ברוב עם הדרת מלך, בעפאר מען וועט ארויסבאגלייט דעם רבי'ן צום לופטפעלד אויף די געהויבענע נסיעה.
כאות הוקרה פאר די חשובע נדיבי לב, וועט דער רבי שליט"א מיטנעמען אויף די רייזע צוויי היסטארישע חפצי ירושה, די טלית פונעם הייליגן ישמח משה זי"ע, און די שטעקן פונעם הייליגן ישמח משה זי"ע, די חשובע משתתפי הנסיעה וועלן האבן די געלעגנהייט דורכאויס די ימי הנסיעה זיך צו באנוצן מיט אט די הייליגע חפצי קודש.
דאנערשטאג דורכ'ן טאג וועט מען מתפלל זיין ביי די קברי צדיקים אין שטאט סיגעט אין ראמעניע, און תפילת שחרית וועט מען דאווענען אין די היסטארישע שוהל הויף אין שטאט סיגעט. פון סיגעט וועט מען צוריקפארן קיין סאטמאר, וואו עס וועט פארקומען א ספעציעלע מעמד תפילה אין די נאסטאלגישע שוהל אין שטאט, וואו הרה"ק מסאטמאר זי"ע האט אפגעראכטן די עבודת הקודש זייענדיג רב אין שטאט. דערנאך וועט מען פארן קיין אוהעל און מתפלל זיין ביים ציון הק' פונעם הייליגן ישמח משה זי"ע.
פרייטאג אינדערפרי וועט מען אנקומען צום שטאט צאנז אין פוילין, וואו עס וועט פארקומען די מעמד סיום כתיבת האותיות פאר די ספר תורה וואס וועט ווערן אריינגעגעבן שבת קודש, דורך די חברי הקהילה אין קרית יואל. דערנאך וועט מען פוקד זיין דעם ציון הק' פונעם הייליגן צאנזער רב הרה"ק בעל דברי חיים זי"ע.
שבת קודש וועט געפראוועט ווערן אין א פראכטפולע האטעל אין שטאט קראקא, וואס איז געווארן ארויסגעדינגען אלס פאסיגע אכסניא פארן געהויבענעם שבת. א גרויסע בית המדרש און היכל הטישן ווערט צוגערישט צו קענען אקאמאדירן די הונדערטער משתתפים אויף א מלכות'דיגן פארנעם, ווען צום הויכפונקט וועט געפראוועט ווערן די מעמד הכנסת ספר תורה שבת אינדערפרי פארן ליינען.
מוצאי שבת קודש וועט געפראוועט ווערן די גרויסע מעמד "עיר מלוכה" דארט אינעם האטעל, אינאיינעם מיט די סעודה לגומרה של תורה. מען וועט הערן דברות קודש פונעם רבי'ן שליט"א, און אלס נואם הכבוד וועט אויפטרעטן הגה"צ ר' אהרן שיף שליט"א גאב"ד אנטווערפן. זונטאג דורכ'ן טאג וועט מען מתפלל זיין ביים ציון הק' פונעם הייליגן רבי'ן ר' אלימלך זי"ע אין ליזענסק, און דערנאך וועט מען זיך אומקערן היים אנגעפולט מיט השפעות טובות.
