האדמו"ר מוויזניץ שליט"א שטארק נתפעל געווארן פון די ספרי הזוהר "בני היכלא", זאגענדיג: דאס איז דאך ממש א חסידישע זוהר!
א הייליגער מעמד איז פארגעקומען פארגאנגענע וואך ערב ל"ג בעומר בביתו נאוה קודש פון כ"ק אדמו"ר מוויזניץ שליט"א לרפו"ש, אין מושב אורה נעבן ירושלים, וואו עס האבן זיך צוזאמגענומען די גדולי הדור אדמורי"ם ורבנים אפצוצייכענען די געוואלדיגע דערגרייכונג ווען עס איז נארוואס ערשינען די דריטע באנד פונעם זוהר "הסולם" מיט די נייע ביאור "בני היכלא" פון כ"ק אדמו"ר מאשלג שליט"א, מהדורת גאלדבערגער המפוארת.
די מעמד איז פארגעקומען אין די געהויבענע שעות פון ערב ל"ג בעומר, אריינטרעטנדיג אין די הילולא פון התנא האלקי רבי שמעון בר יוחאי זי"ע, מחבר ומחולל ספר הזוהר הק' וואס טוט באלייכטן גאנץ כלל ישראל איבער דער גארער וועלט. די מעמד איז פארגעקומען אין א ספעציעלן שאטער וואס איז געווארן אויפגעשטעלט לכבוד די מעמד פארנט פונעם וויזניצער רבי'נ'ס מעון הנופש, צו וואו עס זענען זיך צוזאמגעקומען א צאל גדולי הדור אדמורי"ם ורבנים.
דער וויזניצער רבי שליט"א איז ווי באקאנט אדוק ומקושר צום לימוד הזוהר, בפרט מיטן ביאור "בני היכלא" פון כ"ק אדמו"ר מאשלג שליט"א, צו וואס דער רבי האט שוין א תקופה צוריק געשריבן א גאר ווארעמע און זעלטענע מכתב הסכמה. דאס זעלביגע האט זיך אפגעשפילט דורכאויס די מעמד ווען דער וויזניצער רבי האט אסאך מאל נאכנאנאנד ארויסגעברענגט זיין געוואלדיגע התרגשות זעענדיג ווי דאס לימוד הזוהר הק' בהבנה ווערט פארשפרייט, זאגענדיג אז גדולי ישראל אין אלע שטעט וואלטן געדארפט אונטערשרייבן א פאראייניגטע קול קורא צו רופן אלע אידן לערנען דעם זוהר הק' מיטן חסידישן ביאור "בני היכלא".
אזוי אויך איז דער וויזניצער רבי אן אייניקל פון הגאון הצדיק ר' יעקב מרדכי בראנדוויין זצ"ל, פון די אריות שבחבורה ביים הייליגן בעל הסולם זי"ע.
בעפאר די מעמד האט כ"ק אדמו"ר מאשלג שליט"א בעל מחבר ביאור בני היכלא באזוכט ביים וויזניצער רבי'ן, וואו מען האט גערעדט איבער די גרויסע און הייליגע דערגרייכונג. דער וויזניצער רבי האט זיך אויסגעדרוקט אז די דאזיגע מעמד גיבט אים כח, און ער שפירט אז רבי שמעון געפונט זיך דא.
דער אשלגער רבי האט איבערגעגעבן פארן וויזניצער רבי'ן די נייע באנד פון זוהר הק' מיטן ביאור בני היכלא, דער וויזניצער רבי האט געבלעטערט דערין און זיך אנגערופן אז דאס איז דאך ממש א חסידישער זוהר, עס איז נישט קיין ספק אז עס שפיגלט זיך אפ די געוואלדיגע מסירת נפש פונעם הייליגן בעל הסולם, און אצינד זעהט מען ווי עס ווערט מקוים "יפוצו מעינותיו חוצה".
עס האט אויפגעטרעטן מיט א דרשה הגה"צ ר' אלעזר שטערן שליט"א גאב"ד מירון, און פון די חשובע רבנים בחצר הקודש וויזניץ, דאן האט דער וויזניצער רבי משמיע געווען דברות קודש, און געזאגט צווישן אנדערע אז די הייל מיטל פאר די היינטיגע דור איז צו לערנען ספרי חסידות, און מיט דעם זוהר קען מען לערנען זוהר הק' מיט חסידות אינאיינעם, דאס איז די ריכטיגע רפואה פארן נפש, און עס ברענגט א גרויסע חשק זיך אריינצוטון אין לימוד התורה מיט א שטארקייט.
כ"ק אדמו"ר מאשלג שליט"א בעל בני היכלא האט אויפגעטרעטן מיט דברות קודש, און ארומגערעדט איבער די שמחת החיים וואס מען זעהט אויף א איד וואס לערנט זוהר הק' מיט פארשטאנד, ווען ער איז זוכה צו זיין פון די בני היכלא דרבי שמעון בר יוחאי.
הגה"צ ר' אליהו אשלג שליט"א ראש כוללי עיטור הרבנים להוראה ותורת הנסתר, ונשיא ממלכת הזוהר בני היכלא, האט צוגעוויזן פארן וויזניצער רבי'ן א וואונדערליכע ליקוט פון כתבי יד קודש פונעם הייליגן בעל הסולם, און די כתבי ידות פונעם ספר הק' פי חכם וואס וועט בעז"ה בקרוב הימים ערשיינען לאור עולם.
