חסידי וויזניץ אין לאנדאן האבן אויפגענומען מיט פרייד די בשורה טובה פון הרחבת גבולי הקדושה, ווען אין די יעצטיגע טעג האט מען אנגעהויבן די פאקטישע בוי ארבעט אויפצובויען א שפאגל נייע בנין בית המדרש וואס זאל צוברענגען גרויס הרחבת הדעת פאר די חשובע מתפללים וחברי הקהילה.
די בית המדרש וואס טראגט שוין א רייכע היסטאריע פון איבער זיבעציג יאר כולן שוין לטובה, געפונט זיך ביים ווינקל פון די פארנומענע סטעמפארד הילל גאס און דאנסמאור ראוד, אין צענטער פון די חרדישע סטעמפארד הילל געגנט, די בית המדרש איז דורכאויס די יארן אויסגעשטיגן אלס א ריכטיגע תל תלפיות פאר חסידי וויזניץ אין שטאט און א ווענדפונקט פאר די גאנצע אומגעגנט.
שוין א לאנגע צייט וואס די ענגשאפט אין ביהמ"ד שפירט זיך שטארק, טראץ וואס עס איז שוין געעפנט געווארן עטליכע באזונדערע שטיבלעך אינערהאלב די קהילה, א ביהמ"ד פאר די אינגעלייט מיטן נאמען "צמח צדיק", און א ביהמ"ד אין די בנין הת"ת מיטן נאמען "ישועות משה".
אצינד נאך לענגערע אפהאנדלונגען האט די הנהלת הקהילה באשלאסן אונטערצונעמען דעם גרויסן פראיעקט אויפצובויען א שפאגל נייע בנין בית המדרש, א גרויסע לופטיגע היכל מיט הונדערטער זיץ פלעצער, א היכל התורה, א נייע מקוה, דאווענען שטיבלעך און נאך. די הויפט קאסטן פון די בוי פראיעקט ווערט פינאנצירט דורך משפחת פעלדמאן הנכבדה, לע"נ דער ראש המשפחה הנגיד החסיד המפורסם ר' חיים משה פעלדמאן ז"ל איש אמונם פון אדמור"י בית וויזניץ, און בריח התיכון און פון די מייסדים פון די וויזניצע קהילה אין לאנדאן. די היכל התורה ווערט נתנדב דורך הנגיד החסיד ר' משה פסח הירשלער הי"ו, לע"נ אביו הרב הגאון ר' שמעון הירשלער ז"ל לאנגיעריגער מגיד שיעור און מרביץ תורה בין כותלי בית המדרש.
אין די יעצטיגע טעג האט מען אנגעהויבן די פאקטישע בוי ארבעט, ווען עס ווערט אויפגעשטעלט א צייטווייליגע בית המדרש אויפן קאר פארק פארנט פון ביהמ"ד, וואו מען וועט דאווענען און לערנען פאר די קומענדיגע צוויי יאר, ביז די ביהמ"ד וואס הייבט שוין יעצט אן געבויעט ווערן אויף מערב זייט פון ביהמ"ד וועט בעז"ה זיין פערטיג לשם ולתפארת.
