דער ציבור דא אין ראקלענד קאונטי איז שוין ב״ה געוואוינט לאנגע יארן ארויסצוקומען שטימען יעדעס יאר, און ווי מער דער ציבור וואקסט בליעה״ר, אלס מער פארמערט זיך די געברויכן צו האבן געטרייע שותפים אויף אלע שטאפלען פון די רעגירונג. מ׳דארף נישט ערקלערן פאר קיינעם די געברויך צו האבן פאליטיקאנטן וואס פארשטייען אונזערע געברויכן סיי פארן רבים און אזוי אויך פאר יחידים.
אבער אין די צייט וואס אין א געווענליכע וואל יאר מאכן אונזערע שטימעס נאר אויס ביז צו די קומענדיגע וואלן, און נישט אייביג וועלן אונזערע שטימען פאקטיש איבערוועגן דעם וואגשאל (הגם ס׳איז נאכאלץ וויכטיג צי שטימען אנצוהאלטן אונזער כח), איז היי יאר אין די פריימערי וואלן דא א געלעגנהייט וואס מאכט זיך נישט אזוי אפט, און די רעזולטאטן קענען זיך שפירן פאר לאנגע יארן.
ווי באקאנט וועט דעם קומענדיגן נאוועמבער פארקומען די וואלן פאר א רייע וויכטיגע פאזיציעס, אנגעהויבן פון די גאווערנאר, פעדעראלע פארטרעטער און וואשינגטאן, סטעיט פארטרעטער אין אלבאני ביז אראפ צו די לאקאלע טאון רעגירונגען. די פארמעסטן זענען ערווארטעט צו זיין גאר היציג אבער רוב קאנדידאטן שטייען נישט אויס קיין פריימערי פארמעסט אינערהאלב זייער פארטיי.
איין וויכטיגע אויסנאם איז די פארמעסט פאר קאנגרעס. אויף די רעפובליקאנער זייט לויפט מייק לאולער, אבער אויף די דעמאקראטישע זייט שפילט זיך אפ א גאר נאנטע פארמעסט. פינף קאנדידאטן ערשיינען אויפן בעלאט, און אנקעטעס צייגן א נאנטע פארמעסט צווישן צוויי פון זיי. די טוירנאוט אין פריימעריס איז געווענליך היבש נידעריג, וואס גיבט א געלעגנהייט פאר רעגיסטרירטע דעמאקראטן צו שענקען א געוואונס פאר א פריינטליכע קאנדידאט.
בלויז איינס פון די קאנדידאטן האט א רעקארד פון ארבעטן לטובותינו דא אין ראקלענד קאונטי, לעגיסלאטור דעיווידסאן פון נייעק. דינענדיג אויף די קאונטי לעגיסלאטור איינאיינעם מיט היימישע עסקנים שטייט זי שטענדיג צו די האנט פונעם היימישן ציבור, ווי זי העלפט יחידים און ארגאניזאציעס צוגלייך. זייענדיג א לאקאלע איינוואוינער פארשטייט זי די געברויכן פון די געגנט, און זי ארבעט שטענדיג צו פארזיכערן אז היימישע ארגאניזאציעס ווי הצלה און חברים זעצן פאר צו קריגן פארגרעסערטע שטיצע פון די קאונטי רעגירונג.
ווי די היימישע עסקנים אין די לעגיסלאטור זענען מעיד פארמאגט זי אן אוזן קשבת פאר יחידים און כלל טוער צוגלייך, און זי שטעלט זיך כסדר אויף די זייט פונעם היימישן ציבור טראץ וואס עס שמעקט נישט פאר פארשידענע עלעמענטן אין די קאונטי, אריינגערעכנט געוויסע איינוואוינער אין איר געגנט. זי האט מיט א דרייסטקייט געשטיצט די לעצטיגע פאזיטיווע טוישונגען גרינגער צו מאכן פאר אינגעלייט צו עפענען ביזנעסער, טראץ וואס אנטי-וואוקס העצער זענען אראפגעקומען אין די לעגיסלאטור צו פארפירן היתכן מ׳רעכנט זיך מיטן היימישן ציבור. די יעניגע פארשווייגן עס טאקע נישט און טוען כסדר העצן קעגן איר אויף סאציאלע מידיע אז זי איז צו נאנט מיט אונזער ציבור, בפרט יעצט דורכאויס דעם קאנגרעס פארמעסט.
ווען די לעגיסלאטור האט פאראיאר געארבעט מיט ארגאניזאציעס צו פארטיילן עסן האט זי פערזענליך זיכער געמאכט אז די פראגראם אנטהאלט אויך כשר׳ע עסן, ארבעטנדיג מיט די היימישע לעגיסלאטורן אז די תומכי שבת ארגאניזאציע זאל קריגן א חלק ניכר פון דעם פראגראם. אירע אויפטוען רעכנט אויך אריין פארצושלאגן א געזעץ נישט צו רעכענען סעילס טעקס אויף גאזאלין פון דריי דאלאר און ארויף, איינשפארנדיג געלט פאר דרייווערס מיט די הויכע געז פרייזן.
ס׳איז איבעריג מאריך צו זיין וואס א קאנגרעס מיטגלידער קען אלס אויפטון, בפרט אויב איז מען פון די פארטיי וואס פארמאגט דעם רוב אין וואשינגטאן. קאנטראל פון קאנגרעס טוישט זיך כסדר, און היי יאר בלאזט דער ווינט קלאר לטובת דעמאקראטן, וואס קען זיי שענקען דאס רוב. די אנדערע קאנדידאטן קומען נישט פון די געגנט און האבן נישט אריינגלייגט די מינדעסטע ארבעט קענענצולערנען אונזער ציבור, אויסער געציילטע לעצט מינוטיגע רעקלאמעס אן קיין זאכליכע נקודות וואס זענען באמת נוגע פאר אונז. לעגיסלאטור דעיווידסאן שטייט אין כסדר׳דיגע פארבינדונג מיט היימישע עסקנים און ס׳איז קריטיש וויכטיג אז יהדות ראקלענד זאל שיקן די ריכטיגע מעסעדזש פאר די העכערע פענסטער, אז מיר פארמאגן הכרת הטוב און שעצן לאנגיעריגע באציאונגען.
די היי יאריגע וואלן איז וויכטיגער ווי געווענליך צוליב וואס סטעיט געזעצגעבער אין אלבאני האבן די וואך אנגעהויבן דעם פראצעדור איבערצומאכן די דיסטריקט מאפעס, וואס איינמאל דאס גייט אריבער איז זייער מעגליך אז אונזער ציבור וועט פארלירן די מעגליכקייט איבערציוועגן די וואגשאל פון איין פארטיי צו די אנדערע. אויב די אמטירנדע קאנגרעס מיטגליד וועט נישט קומען פון אונזער געגנט און זיך נישט באזונדער רעכענען מיט אונז הערשט א געפאר אז די קאונטי קען צושפליטערט ווערן צווישן עטליכע דיסטריקטס וואס קען אוועקנעמען אונזער מעגליכקייט אויסצומאכן אפילו אין די פריימעריס. אויב ווילט איר א לעבעדיגע דוגמא דאן כאפט א בליק אויף בארא פארק ווי בלויז טייל איינוואוינער קענען אריינרעדן אין אן ארטיגע היציגע קאנגרעס פארמעסט צווישן א קאנדידאט וואס ארבעט מיטן ציבור און א ראדיקאלן קאנדידאט וואס רעכנט זיך ווייניג מיט אונז.
ס׳איז וויכטיג אונטערצושטרייכן אז אייער שטימע אין די פריימערי איז אייך נישט מחייב אין נאוועמבער, ווען איר קענט שטימען פאר סיי וועלכער קאנדידאט אויפן בעלאט. סך הכל האט איר די רעכט אין די פריימעריס צו ערוועלן א קאנדידאט וואס פארשטייט אונז און האט א רעקארד פון ארבעטן מיט אונז אין פאל די דעמאקראטן זענען זיגרייך.
די וואלן קומען פאר קומענדיגן דינסטאג חוקת-בלק הבעל״ט, און מ׳קען שטימען פרי אין ״ערלי וואוטינג״ ביזן קומענדיגן זונטאג.
