בחצר הקודש שבט הלוי גרייט מען זיך אצינד אויף א גרויסע שמחה אינעם רבינ'ס הויף, ווען עס וועט צום ערשטן מאל געפראוועט ווערן א שמחת החתונה אין ביהמ"ד הגדול שבט הלוי אויף רחוב הרב דסלר אין די זכרון מאיר געגנט אין בני ברק.
די שמחת החתונה קומט פאר דעם מיטוואך פרשת בלק, ווען עס וועט גיין אונטער די חופה די כלה א טאכטער ביים רבינ'ס זון הגה"צ ר' אברהם אליהו וואזנער שליט"א, איידעם ביי הגה"צ אבד"ק מאקאווא אלעד זצ"ל, מיט די חתן א זון פון הגה"צ ר' יוסף ישכר דוב מאסקאוויטש שליט"א, זון פון כ"ק אדמו"ר משאץ שליט"א פון בני ברק.
זייענדיג דאס ערשטע מאל וואס עס וועט געפראוועט ווערן א חתונה אינעם היכל ביהמ"ד, בית מדרשו פונעם פוסק הדור הגה"ק בעל שבט הלוי זצ"ל וועלכער האט מקדש געווען דעם הייליג ארט מיט זיינע הייליגע תפילות און שיעורי תורה צענדליגע יארן נאכאנאנד, האט נכדו ממלא מקומו כ"ק אדמו"ר משבט הלוי וגאב"ד זכרון מאיר שליט"א איבערגעגעבן א רייע הלכה'דיגע אנווייזונגען וויאזוי זיך צו פירן ווען מען רעכט אפ א שמחה אין ביהמ"ד.
צום ערשט האט דער רבי שליט"א געגעבן די הוראה אז גענוי ווי זיין זיידע הגה"ק בעל שבט הלוי זצ"ל האט מקפיד געווען אלע יארן אז אין היכל בית המדרש זאלן נישט אריינקומען קיין נשים, זאל מען אויך שטארק מקפיד זיין דערויף ביים גאנצן שמחת החתונה, און אפילו ביים מצוה טאנץ זאלן די נשים זיך געפונען בלויז אין די לאבי פון ביהמ"ד, און נישט אינעם היכל ביהמ"ד זעלבסט.
אזוי אויך זאל מען אויפשטעלן א פולשטענדיגע מחיצה פארנט פון די ארון הקודש, אז די אויבן אן פלאטפארמע זאל נישט זיין פארנט פון ארון הקודש, און די מחיצה זאל זיין א געהעריגע הויכע מחיצה מיט אלע דקדוקי הלכה, עס זאל אפטיילן אלס א באזונדערע צימער.
