פילע אידן האבן היינט פארמיטאג מיטגעהאלטן א אייגענארטיגע מעמד פדיון הבן אין ביהמ"ד הגדול מאחנובקא בעלזא אין בני ברק, ווען א עלטערער איד וואס פארמאגט נישט קיין אייגן הויז, און דרייט זיך אסאך בין כותלי ביהמ"ד און אין שטוב פון כ"ק אדמו"ר ממאחנובקא בעלזא שליט"א, האט מקיים געווען די מצוה פון פדיון הבן די ערשטע מאל אין זיין לעבן.
דער זיבן און פופציג יעריגער איד מיטן נאמען ר' דוד, איז א באקאנטער איד אין בני ברק, און ביי חסידי מאחנובקא בעלזא בפרט, ער דרייט זיך אסאך אין ביהמ"ד מאחנובקא בעלזא וואו ער פארברענגט לאנגע שעות, און אזוי אויך איז ער אן אפטער גאסט אין שטוב פונעם רבי'ן שליט"א, וועלכער האלט אפן זיין שטוב ווי באקאנט לכל דורש ומבקש.
נאך וואס מען איז לעצטנס געוואויר געווארן אז ר' דוד איז א בכור און איז קיינמאל נישט געווארן אויסגעלייזט כהלכה, האט דער רבי שליט"א מברר געווען אלע דעטאלן איבער זיין אפשטאם און דאס גלייכן, און אויפן ארט אראנדזשירט א שיינע מעמד פדיון הבן אין ביהמ"ד הגדול מאחנובקא בעלזא, וואס איז געווארן אפגעראכטן היינט דינסטאג פארמיטאג נאך תפילת שחרית.
אלס כהן הפודה האט דער רבי שליט"א איינגעלאדנט ידידו ורעו כ"ק אדמו"ר מספינקא ב"ב שליט"א וועלכער דינט שוין לאנגע יארן אלס מרביץ תורה אין ישיבת מאחנובקא בעלזא, דער מאחנובקא בעלזא רבי שליט"א האט אליינס געקויפט די זילבערנע מטבעות און עס געשאנקען פאר ר' דוד זיך צו קענען אויסלייזן כדת וכדין.
נאכן דורכפירן דעם פדיון כהלכה האט דער רבי שליט"א אפגעראכטן א לחיים טיש ברוב עם, וואו מען האט פארברענגט בדברי תורה וחסידות, דער רבי שליט"א האט משמיע געווען דברות קודש, און אזוי אויך דער כהן הפודה כ"ק אדמו"ר מספינקא ב"ב שליט"א, דאן האט דער רבי געבעטן פון ר' דוד אויפצוטרעטן מיט ווערטער, און ער האט טאקע ארויסגעברענגט רגשי לבבו אז ער האט זוכה געווען צו מקיים זיין דעם הייליגן מצוה.
