מיט גרויס כבוד והערצה און רגשי שמחה האבן די אידישע איינוואוינער אינעם עיר התורה געיטסהעד אין ענגלאנד, אויפגענומען זייער נייער רב און מרא דאתרא, הגאון הגדול רבי ישראל מאנטעל שליט"א, וועלכער איז מיט עטליכע חדשים צוריק געווארן ערוועלט אלס רב אין שטאט, נאך א צייט אפשניט פון פינף יאר וואס די קהילה אין געיטסהעד האט נישט פארמאגט קיין רב.
דער רב שליט"א האט פארלאזט זיין ביז יעצטיגער היים אין וואשינגטאן הייטס, וואו ער האט משמש געווען ברבנות אין ביהמ"ד קהל עדת ישורון, און האט געגרייכט דעם ענגלישן באדן פארגאנגענע וואך דינסטאג פרשת חוקת בלק ח' תמוז. אנקומענדיג אין שטאט אויף די הויפט ביואיק גאס איז דער רב שליט"א געווארן אפגעווארט דורך די הונדערטער חברי הקהילה, אינגעלייט און בעלי בתים, אינאיינעם מיט די הונדערטער ילדי התשב"ר וואס זענען געשטאנען מיט פאקלען אין די הענט און געזינגען ניגוני שמחה וכבוד התורה.
אויפן ארט זענען אויך ארויסגעקומען מקבל פנים זיין דעם נייעם רב, די גדולי הרבנים ומרביצי תורה אין שטאט, הגאון הגדול רבי אברהם גורוויץ שליט"א ראש ישיבת געיטסהעד, הגאון הגדול רבי יעקב עהרנטרוי שליט"א ראש ישיבת סאנדערלאנד, הגאון הגדול רבי מרדכי יוסף קארנאווסקי שליט"א משגיח אין ישיבת געיטסהעד, און נאך חשובע עסקנים פרנסים און כלל טוער.
א ספעציעלע מעמד קבלת פנים איז פארגעקומען אין די לאקאלע מיידל שולע, וואו די הונדערטער בנות ישראל הכשרות האבן אנטפאנגען דעם רב בבואו לחון את פני העיר.
פארלאפענעם דאנערשטאג י' תמוז איז פארגעקומען די צענטראלע מעמד ההכתרה, וואו עס האבן זיך פארזאמלט די הונדערטער תושבי העיר אין שפיץ פון פילע רבנים און חשובע דעלעגאציעס פון איבער גאנץ אייראפע, די מעמד איז פארגעקומען אין די פראכטפולע לעזשער צענטער וואס איז געווען גאר שיין צוגעגרייט לכבודה של תורה.
טאלאנטפולע בעלי מנגנים פון די געיטסהעד קאפעליע צוזאמען מיט א קינדער כאר האבן מהנה געווען בשירה וזמרה, און אלס יושב ראש המעמד האט אויפגעטרעטן הרה"ג ר' יודא לייב וויטלער שליט"א ראש ישיבת שערי חיים אין מאנטשעסטער. דער ראש הקהל הרב מאיר מנשה באדנער הי"ו האט ווארעם באגריסט דעם ציבור און ארויסגעברענגט דעם דבר הקהילה. דאן האט דער משגיח הגאון רבי מרדכי יוסף קארנאווסקי שליט"א פארגעזאגט פרקי תהלים, און א ספעציעלע מי שברך לרפואתו פון הגאון הגדול רבי אברהם יהושע הלוי סאלאווייטשיק שליט"א ראש ישיבת בריסק.
דורכאויס די מעמד האט הגאון הגדול רבי יעקב עהרנטרוי שליט"א ראש ישיבת סאנדערלאנד פארגעליינט די כתב הכתרה, און נאכן איבערגעבן די כתב הכתרה פארן נייעם רב האט דער גאנצער ציבור אויסגעשריגן א הילכיגן מזל טוב. דאן האט אויפגעטרעטן מיטן משא המעמד הגאון הגדול רבי אברהם גורוויץ שליט"א ראש ישיבת געיטסהעד.
דער נואם הכבוד הגה"צ רבי אהרן שיף שליט"א גאב"ד אנטווערפן האט אויפגעטרעטן מיט א הפלא'דיגע דרשה איבער די גרויסע כח פון א רב און די וויכטיגקייט פון זיך האלטן צוזאמען באחדות, אזוי אויך האט אויפגעטרעטן הרה"ג ר' חיים משה לעווי שליט"א רב פון די יעקישע קהילה אין ציריך, וועלכער האט בתוך דבריו איבערגעגעבן דברי ברכה פון הגה"צ ר' צבי אלימלך פאדווא שליט"א רב פון די חסידישע קהילה אין ציריך.
אזוי אויך האט מען פארגעליינט עטליכע מכתבי ברכה פון גדולי הדור, דער פוסק הדור מרא דארעא קדישא שליט"א, הגאון הגדול רבי דוב לאנדא שליט"א און הגאון הגדול רבי משה הלל הירש שליט"א ראשי ישיבת סלאבאדקע, זקן ראשי הישיבות הגאון הגדול רבי מאיר צבי בערגמאן שליט"א, כ"ק אדמו"ר מוויזניץ שליט"א פון לאנדאן, און א בריוו מטעם בית דין צדק התאחדות קהילות החרדים אין לאנדאן.
צום הויכפונקט האט דער נייער רב הרה"ג ר' ישראל מאנטעל שליט"א אויפגעטרעטן מיט די איינצוגס דרשה כנהוג, אנגעטון מיט א נייער טלית וואס איז געקויפט געווארן במתנה פארן רב שליט"א.
