חסידי סקווירא ברחבי תבל האלטן מיט פרישע הרחבת גבולי הקדושה, זיך מיטפרייענדיג מיט די שיינע קבוצה חסידי סקווירא אין די שטאט וועסטקליף אין ענגלאנד, וועלכע זענען אין די יעצטיגע תקופה אריין אין קאנטראקט אויף א גיגאנטישע שטח און בנינים אלס אכסניא של תורה ותפילה פאר די סקווירא קהילה אין מוסדות אין שטאט.
די חסידישע געגנט אין וועסטקליף, געפונט זיך ארום א שעה צו פארן פון די באקאנטע סטעמפארד הילל געגנט אין לאנדאן, פילע חסידישע אינגעלייט פון לאנדאן ציען זיך ארויס קיין וועסטקליף אין די לעצטערע יארן, וואו מען קען זיך איינהאנדלען א אייגענע דירה פאר פיל ביליגער ווי אין די איבערגעפולטע סטעמפארד הילל געגנט אין לאנדאן.
אין די יעצטיגע וואכן איז אונטערגעקומען א איבערראשנדע מקח פאר די סקווירא קהילה אין וועסטקליף, און בברכתו הקדושה פון כ"ק אדמו"ר מסקווירא שליט"א איז מען אריינגעשפרינגען אינעם מקח און אונטערגעשריבן קאנטראקט, פארן פרייז פון אביסל מער ווי א מיליאן פונט, אויף וואס מען באקומט צוויי גרויסע שולע בנינים, און א גיגאנטישער שטח פון פיר און א האלב אקער לאנד.
אין די יעצטיגע טעג איז געלאזט געווארן אין גאנג א מאסיווע געלט אקציע צווישן חסידי סקווירא איבער די וועלט, צו שאפן די נויטיגע געלטער צו קענען גומר זיין דעם מקח, דער סקווירא רבי שליט"א האט געשטעלט א וועד פון עטליכע עסקנים צו שטיין אין שפיץ פונעם דעם מקח, און לויטן פלאן וועט מען באלד נאכן שליסן דעם מקח זיך אריינציען אין די געביידע, און אוועקשטעלן דעם שיינעם אכסניא פאר די סקווירא קהילה אין וועסטקליף, מיט נאך פארשידענע פלענער אויפצובויען אויפן שטח פילצאליגע דירות פאר ביליגע פרייזן און נאך בניני המוסדות.
