חסידי אלכסנדר זענען איינגעהילט אין עקסטאז זיך גרייטענדיג צו מקיים זיין די גרויסע מצוה פון כתיבת ספר תורה אויף א פאראייניגטע פארנעם, נאך וואס כ"ק אדמו"ר מאלכסנדר שליט"א האט אנגעטראגן פארן ציבור זיך צו משתתף זיין אין דעם גרויסן מצוה פון כתיבת ספר תורה, דורכ'ן זיך מקבל זיין קבלות טובות זיך צו שטארקן מיט די היינטיגע שווערע נסיונות.
ווי באריכטעט איז נעכטן מאנטאג פארגעקומען די גרויסע מעמד הנחת אבן הפינה פארן נייעם ביהמ"ד מרכז העולמי דחסידי אלכסנדר אין בני ברק, און ביי די דברות קודש האט כ"ק אדמו"ר מאלכסנדר שליט"א געמאלדן פארן ציבור איבער די פרישע אונטערנעמונג פון מצוות כתיבת ספר תורה.
דער רבי האט דערציילט אז א טייערער איד האט אים מזכה געווען מיט א ספר תורה מהודר, און דעריבער וויל ער מציע זיין פאר אלע אנשי שלומינו פון נאנט און ווייט, אנשים נשים וטף, צו זיין א שותף אין דעם ספר תורה, דורכ'ן זיך מקבל זיין א קבלה טובה, יעדער איינער מיט וואס ער דארף זיך גודר זיין, יעדער ווייסט דאך אז די וועלט איז זייער נפרץ מיט גוי'אישקייט, און יעדער ווייסט דאך די אלע נסיונות.
דער רבי האט ממשיך געווען און געזאגט, אז מען וועט ארגענעזירן א וועד וואס וועט עס פירן, יעדער זאל זיך מקבל זיין און זיין בקשר מיט דעם וועד צו זיין א שותף, די וועד וועט אים מזכה זיין א קנין אינעם ספר תורה, סיי א שותף אינעם כתיבה, און סיי א שותף אינעם ספר, און מיר אלע וועלן זוכה זיין צו עץ חיים היא למחזיקים בה ותומכיה מאושר.
אויפן רבינ'ס בקשה פארמירט זיך אצינד א ספעציעלע וועד פון עסקנים וואס וועלן אנפירן דעם קאמפיין, און מזכה זיין דעם גאנצן ציבור מיט א זכות אינעם ספר תורה, דורך קבלות טובות לויט פארשידענע דרגות וואס וועט ווערן ארויסגעשטעלט אין די קומענדיגע טעג.
