מיט גרויס פרייד און עקסטאז האבן הונדערטער חסידי אלכסנדר און תושבי בני ברק מיטגעהאלטן דעם שיינעם און היסטארישן מעמד הנחת אבן הפינה וואס איז פארגעקומען נעכטן מאנטאג פרשת מטות מסעי, ווען עס איז געלייגט געווארן די גרונדשטיין פאר די נייע ביהמ"ד הגדול מרכז העולמי דחסידי אלכסנדר, אויפן ארט וואו עס איז געשטאנען איבער א יובל יארן די נאסטאלגישע בית המדרש דחסידי אלכסנדר אויף רחוב אחיעזר אין בני ברק.
די ביהמ"ד וועלכע האט יארן לאנג געדינט אלס אכסניא של תורה ותפילה פארן אלכסנדר הויף, צוערשט בימי מלכותו פון הרה"ק בעל אמונת משה זצ"ל, דערנאך ביי הרה"ק בעל אמרי מנחם זצ"ל, און די לעצטע צוואנציג יאר ביי להבחל"ח בנו ממלא מקומו כ"ק אדמו"ר מאלכסנדר שליט"א, איז שוין אין די לעצטערע יארן אויסגעוואקסן איר געברויך, און די נויט אהערצושטעלן א נייע גרויסע ביהמ"ד האט זיך אנגעזעהן אויף טריט און שריט.
מיט עטליכע חדשים צוריק האט מען שוין אנגעהויבן די פאקטישע בוי ארבעט, ווען מ'האט צוזאמגעווארפן די אלטע געביידע און אנגעהויבן גראבן אויפן שטח, אצינד ווען מען האט שוין געהאלטן ביים גיסן די יסודות הבנין איז געפראוועט געווארן די גרויסע מעמד הנחת אבן הפינה ברוב עם הדרת מלך, אין שפיץ פון כ"ק אדמו"ר מאלכסנדר שליט"א און פילע רבני ואדמור"י העיר.
אויפן בימת הכבוד האבן באשיינט לצידו פונעם רבי'ן זיינע גרויסע שוואגער'ס, כ"ק אדמו"ר ממודזיץ שליט"א, און כ"ק אדמו"ר מבוטושאן שליט"א, איידימער ביים אלכסנדר רבי'ן זצ"ל, כ"ק אדמו"ר מלוצק שליט"א איידעם ביים היינטיגן אלכסנדר רבי'ן שליט"א, הגאון הגדול רבי משה הלל הירש שליט"א ראש ישיבת סלאבאדקע וועלכער האט אויפגעטרעטן מיט דברי ברכה און אונטערגעשריבן דעם מגילת היסוד, הגאון הגדול רבי חיים יצחק אייזיק לאנדא שליט"א גאב"ד בני ברק וועלכער האט אויפגעטרעטן מיט דברי ברכה, הגאון הגדול רבי שמואל אליעזר שטערן שליט"א גאב"ד מערב ב"ב וועלכער האט אויך משמיע געווען דברי ברכה, און נאך חשובע אדמורי"ם ורבנים.
לכבוד די מעמד איז ערשינען א ספעציעלע קונטרס מיט די נוסח התפילות וואס איז מקובל צו זאגן ביי הנחת אבן הפינה, ווי עס האט אוועקגעשטעלט כ"ק אדמו"ר הרה"ק בעל אמונת משה מאלכסנדר זצ"ל, ווען מ'האט געפראוועט דעם הנחת אבן הפינה פארן אלטן ביהמ"ד אין בני ברק אין יאר תשכ"ט, עס נעמט אריין עטליכע קאפיטלעך תהלים, פיוטים און פסוקים המסוגלים.
אלס יושב ראש האט אויפגעטרעטן הרה"ג ר' שמעלקא האלפערט שליט"א ראש ישיבה קטנה דחסידי אלכסנדר, דערנאך האט מען געזאגט פרקי תהלים, פארגעזאגט דורך הגה"צ ר' יחיאל דאנציגער שליט"א זון פונעם רבי'ן זצ"ל, און דאן האט דער רבי שליט"א אויפגעטרעטן מיט דברות קודש, וואו ער האט רייך געשילדערט די השתלשלות פונעם אלכסנדר הויף אין ארץ ישראל, דער רבי האט ערווענט אז ער איז זיכער אז אלע רבי'ס פון אלכסנדר געפונען זיך דא אזויווי ביי א שמחה פון א קינד, און דערביי האט דער רבי אויסגערעכנט די נעמען פון אלע אלכסנדר רביים וואס פרייען זיך מיט מעלמא דקשוט.
דערנאך האט בנו הגדול פונעם רבי'ן שליט"א הגה"צ ר' אליעזר יצחק דאנציגער שליט"א פארגעליינט די מגילת היסוד, וואס איז געווארן אונטערגעשריבן דורכ'ן רבי'ן און די אנוועזנדע רבנים, און כ"ק אדמו"ר מאלכסנדר שליט"א האט פארגעזאגט א ספעציעלע נוסח מיט א תנאי ווען מ'בויעט א נייע שוהל, אז מען זאל קענען נוצן דעם בית המדרש אויך פאר סעודות און מסיבות מרעים צווישן חסידים אינאיינעם.
צום הויכפונקט האט דער רבי שליט"א געגאסן די יסודות און מכבד געווען די אנוועזנדע אדמורי"ם ורבנים, חשובי העדה און די טעטיגע עסקנים ונדיבים. מען האט געזינגען פרייליכע ניגוני שמחה צו דאנקן און לויבן דעם אויבערשטן אויף די גרויסע דערגרייכונג.
נאכן גיסן די יסודות האט מען אריינגעברענגט לעקאך און לחיים, און דער רבי שליט"א האט געוואונטשן לחיים פארן גאנצן ציבור, זאגענדיג אז ער וויל בעטן פון יעדן איינעם צו זאגן יעדן טאג די יום לחודש אין ספר תהלים, עס זאל זיין א זכות אז די בוי ארבעט זאל אנגיין מיט הצלחה אויף א שנעלן פארנעם, און אזוי וועט יעדער זיין א שותף אינעם בנין.
דער רבי האט ממשיך געווען מיט א איבערראשנדע מעלדונג, היות אז א טייערער איד האט אים מזכה געווען מיט א ספר תורה מהודר, וויל ער מציע זיין פאר אלע אנשי שלומינו פון נאנט און ווייט, אנשים נשים וטף, צו זיין א שותף אין דעם ספר תורה, דורכ'ן זיך מקבל זיין א קבלה טובה, יעדער איינער מיט וואס ער דארף זיך גודר זיין, יעדער ווייסט דאך אז די וועלט איז זייער נפרץ מיט גוי'אישקייט, און יעדער ווייסט דאך די אלע נסיונות.
דער רבי האט ממשיך געווען און געזאגט, אז מען וועט ארגענעזירן א וועד וואס וועט עס פירן, יעדער זאל זיך מקבל זיין און זיין בקשר מיט דעם וועד צו זיין א שותף, די וועד וועט אים מזכה זיין א קנין אינעם ספר תורה, סיי א שותף אינעם כתיבה, און סיי א שותף אינעם ספר, און מיר אלע וועלן זוכה זיין צו עץ חיים היא למחזיקים בה ותומכיה מאושר.
