תושבי מאנסי באגריסן מיט פרייד די עפענונג פון א שפאגל נייע פראכטפולע חתונה זאל, אין די נייע בנין פון די וויזניצע מיידל שולע אויף סקול טערעס.
די נייע זאל "תפארת עלקא", ווערט גערופן אויפן נאמען פון די מאמע פונעם נדבן הרבני הנגיד ר' בנימין פיליפסאן הי"ו, יעצט נאכמיטאג קומט פאר די מעמד קביעת מזוזה אין די נייע זאל אין שפיץ פונעם וויזניצער רבי'ן שליט"א, מיט די באטייליגונג פון די נגידים בעם וואס האבן מנדב געווען די נייע זאל. מארגן מיטוואך וועט פארקומען א מעמד הכרת הטוב דורך די וויזניצע מוסדות פאר די תומכים נכבדים, און דעם דאנערשטאג וועט געפראוועט ווערן די ערשטע חתונה אין דעם נייעם זאל.
די נייע זאל איז אהערגעשטעלט גאר פראכטפול און עלעגאנט, דעזיינט דורכ'ן מייסטער אין דעם געביט "חיים הורוויץ דעזיין" און זיין געלונגענע סוויטע ארבייטער, יעדע דעטאל איז אויסגערעכנט צום מאקסימום, די רואיגקייט און געשמאק, די שיינקייט צום היינטיגן טאקט, און צו די זעלבע צייט אויף א חסידישע פארנעם אן קיין איבריגע שווענקלערייען. די חתונות אינעם נייעם זאל וועט געפירט ווערן אויף הויכע כשרות סטאנדארטן, אונטער די געניטע פירערשאפט פון די זעלבע פארוואלטונג ווי די ווילחאוויץ זאל, וועמען די גאנצע שטאט טוט באלויבן אויף די אויסערגעווענליכע סערוויס אין יעדע צייט.
