די בארימטע ישיבה תורת בנימין אין דאוואס שווייץ, וואס איז געעפנט געווארן אין לויף פון די קאראנע וויירוס עפאכע, האט אין די יעצטיגע טעג געמאלדן אז זיי גרייטן זיך צו שליסן די טויערן, נאך שוועריגקייטן אויפצוהאלטן די ישיבה אין די מרחקים.
אין יענע שווערע תקופה ווען די בחורי הישיבות האבן נישט געהאט די מעגליכקייט צו פארן לערנען אין זייער קביעות'דיגע ישיבות, צוליב די שווערע מצב איבער די גאנצע וועלט, האבן א גרופע עסקנים און מרביצי תורה געגרינדעט די ישיבה תורת בנימין אין די הויכע שווייצע בערג, און אריבערגעברענגט מגידי שיעור פון ארץ ישראל, וואס דארט אין שווייץ האט מען שטענדיג געקענט פארן אפילו ווען כמעט אלע לענדער זענען געווען פארשפארט אונטער שלאס און ריגל.
די ישיבה איז אנגעגאנגען מיטן פולן קראפט און גרויס הצלחה, ווען פילע בחורים האבן דארט געלערנט און געשטיגן בתורה ועבודה, אצינד אבער ווען די הנהלת הישיבה האט זיך דערזעהן אין א מצב אז זיי קענען נישט ווייטער אנגיין, איז באשלאסן געווארן צו שליסן די טויערן, אין די צייט וואס יעדער קען שוין פארן אין די מרחקים לערנען אין פארשידענארטיגע ישיבות.
אין די מודעה שרייבט די הנהלת הישיבה, אז דער חשובער מרביץ תורה הרה"ג ר' שמואל בנימין שפירא שליט"א וועט עפענען א נייע חבורה אין ירושלים פאר אלע בחורים וואס לערנען אצינד אין דאוואס, און די סדרי הלימודים וועט זיך אנהייבן תיכף נאך פסח.
