ליידער האט ווידער פאסירט א שרעקליכע טראגעדיע היינט מיטאג אין מאנסי, ווען א קליין קינד איז ל"ע טראגיש אומגעקומען נאכן ווערן אראפגעקלאפט דורך א באס, בלויז צוויי וואכן נאך א ענליכע טראגעדיע וואס האט פאסירט אין שיכון סקווירא, מיט די טראגישע פטירה פון הילד הנחמד מרדכי פנחס שפיטצער ע"ה.
דאס פינף יעריג מיידל, טויבא רחל ניימאן ע"ה, א טאכטער פון הרה"ח ר' יונה חיים ניימאן הי"ו, איז געווען אויפן וועג אהיים פון די סאטמארע מיידל שולע בית אסתר אויף סאוט מעדיסאן און רוט 45, די באס האט זיך אפגעשטעלט פארנט פון איר הויז אויף סאוט מעדיסאן ביים ווינקל פון וועסט פאנסטען, דאס מיידל איז אראפ פון די באס, און איז ל"ע באלד אראפגעקלאפט געווארן ווען די באס האט אנגעהויבן פארן.
חברה הצלה האבן שווער געארבעט צו ראטעווען דאס מיידל, אבער ליידער איז באשטעטיגט געווארן איר טראגישע פטירה רח"ל, אין די צייט וואס די וואלאונטירן פון חסד של אמת זענען געווען אויפן סצענע צו פארזיכערן כבוד המת.
די לוויה וועט ארויסגיין היינט פרייטאג צוויי אזייגער נאכמיטאג פארנט פון ביהמ"ד הגדול סאטמאר אין מאנסי.
די לאקאלע פאליציי טוט אויספארשן דער דרייווער צו דערגיין וויאזוי דאס האט פאסירט, כלל ישראל שרייט ארויס מיט אנגסט שלא ישמע עוד שוד ושבר בגבולינו, ונשמע ונתבשר בשורות טובות ישועות ונחמות.
