אלפי חסידי סקווירא פון אלע שטעט מאכן יעצט זייער וועג צום קרית מלך רב קיין שיכון סקווירא, אפצוגעבן דעם כבוד האחרון פאר הרבנית הצדיקת מסקווירא ע"ה, און זיך משתתף זיין בצערו של אבא מיט די שרעקליכע פארלוסט בחצר בית המלך.
מטעם קהל צמח דוד אין שיכון סקווירא איז געמאלדן געווארן אז די גרויסע לוויה וועט זיך אנהייבן אכט אזייגער אויפדערנאכט ביים ריזן שטח פארנט פון ביהמ"ד הגדול, די ציבור האלפים וועלן זיין פארזאמלט אינעם חצר בית המדרש און די דערנעבענדיגע דזשעפערסאן גאס, די בני המשפחה וועלן זיך געזעגענען בביתו נאוה קודש פון כ"ק אדמו"ר מסקווירא שליט"א, און דערנאך וועט מען זאגן קל מלא רחמים פארנט פון ביהמ"ד הגדול.
פון דארט וועט מען באגלייטן די מיטה אויפן וועג צום בית החיים אין סקווירא שטעטל, אויפן בית החיים וועט כ"ק אדמו"ר מסקווירא שליט"א און די קינדער רייסן קריעה כדין, און מען וועט מאכן די הקפות כנהוג דורך די רבנים וחשובי העדה, דערנאך וועט די רעבעצין באערדיגט ווערן למנוחת עולמים אין די אוהל פון די פריערדיגע רעבעצין ע"ה, און איר טאכטער הרבנית מזוועהיל ע"ה.
דער ברודער כ"ק אדמו"ר מויזניץ שליט"א האט א קורצע צייט צוריק ערהאלטן די שווערע בשורה בביתו נאוה קודש, דער רבי האט באלד געריסן קריעה און זיך געזעצט שבעה ביי זיך אין שטוב אין קרית ויזניץ בני ברק.
דער ברודער כ"ק אדמו"ר מויזניץ שליט"א וועט מארגן ניין אזייגער צופרי אריינקומען בבית מדרשו אין בני ברק, און רייסן קריעה כדין, דערנאך וועט מען דאווענען שחרית און דער ציבור וועט אריבערגיין מנחם אבל זיין.
שנשמע ונתבשר בשורות טובות.
