אין די יעצטיגע טעג איז באשטעטיגט געווארן בחצר הקודש באבוב די גרויסע טאג יום החגיגה, ווען עס וועט געפייערט ווערן די מעמד חנוכת הבית פאר די שפאגל נייע בנין התלמוד תורה בני ציון ד'באבוב אין בארא פארק, במקהלות פילע חסידים ואנשי מעשה ברוב פאר והדר.
די גרויסארטיגע מעמד ששים בבואם וועט פארקומען דעם קומענדיגן זונטאג פרשת תזריע כ"ח אדר ב', אין די נייע פראכטפולע בנין התלמוד תורה וואס איז אויפגעבויעט געווארן אין די לעצטע פאר יאר, ביים ווינקל פון די זעקס און דרייסיגסטע סטריט און טשורטש עוועניו, ביי איינס פון די צענטראלע וועגן אריין צום היימישן שטאט בארא פארק.
די מעמד חנוכת הבית וועט ארייננעמען צוויי גרויסע שמחות, ווען מ'וועט פייערן די חגיגת חנוכת הבית אויך פאר די נייע מיידל שולע בנין בנות ציון, וואס איז באנייעט געווארן מיט א האלבע יאר צוריק.
די נייע תלמוד תורה בנין וואס איז די גרעסטע חדר בנין אין בארא פארק, האט אפגעקאסט די פאנטאסטישע סומע פון אכציג מיליאן דאללער, ניין שטאק פון חדרי תורה, צוויי חתונה זאלן פאר פרייליכע שמחות, און נאך פארשידענע איינריכטונגען.
