מיט איבערגיסנדע געפילן פון שמחה און התרגשות האבן חסידי ומעריצי בית סקולען אויפגענומען די פרייליכע נייעס, אז כ"ק אדמו"ר מסקולען שליט"א איז אין א מזל'דיגע שעה אנגעקומען צוריק אהיים לביתו נאוה קודש אין בארא פארק, נאך לאנגע חדשים וואס דער רבי האט געוויילט אינעם ווייטן אריזאנע צוליב געזונטהייט קאמפליקאציעס.
דער רבי איז אהיימגעקומען נעכטן מיטוואך ביינאכט מיט א פריוואטע פליגער, אין באגלייטונג פון א פערזענליכע דאקטער על כל צרה שלא תבוא, אנקומענדיג אהיים שפעט ביינאכט האבן אפגעווארט פארנט פון ביהמ"ד א ציבור חסידים, וועלכע האבן געזינגען אינאיינעם ניגוני שבח והודאה.
פונעם רבינ'ס שטוב איז געמאלדן געווארן, אז אין די קומענדיגע תקופה וועט נישט פארקומען קיין קבלת קהל בקודש פנימה, און אזוי אויך וועט מען אויף דערווייל נישט קענען קומען לייגן תפילין ביים רבי'ן, בלויז ברית'ן וועט קענען פארקומען ביים רבי'ן אין שטוב. ווי עס זעהט אויס וועט דער רבי אריינקומען דעם פרייטאג צונאכטס אין ביהמ"ד צום דאווענען, און תיכף דערנאך פראווענען א קורצע טיש שירות ותשבחות, אזוי אויך האפט מען אז דער רבי וועט זיך בעז"ה באטייליגן ביי די שמחת החתונה פון א אייניקל קומענדיגע וואך אין מאנסי.
