תלמידי וחסידי סאטמאר אין בארא פארק זענען איינגעהילט אין שמחה והתרגשות, ווען היינט איז געמאלדן געווארן די פרייליכע בשורה איבער די עפענונג פון א שפאגל נייע בית המדרש אינערהאלב די מעכטיגע אימפעריע פון קהל יטב לב ד'סאטמאר, תחת דגלו והדרכתו פון כ"ק אדמו"ר מסאטמאר שליט"א.
היינט איז געמאלדן געווארן מטעם הקהילה, אז די הנהלת הקהילה איז אריין אין קאנטראקט אפצוקויפן דעם גרויסן בנין ביי ניו יוטרעקט ביים ווינקל פון די אכט און פופציגסטע סטריט, אויפן ארט וואו עס איז פאר לאנגע יארן געווען איינקוואטירט די באקאנטע "פאראדייס מענאר" שמחה זאל, און באדינט פילע תושבי בארא פארק אלס א געשמאקע אכסניא פאר זייערע שמחות.
מיט עטליכע חדשים צוריק האט א שווערע פייער פארניכטעט די פאראדייס מענאר זאל, ברענגענדיג שווערע שאדן פאר די אייגענטומער פונעם זאל, וועלכע האבן ארויסגעשטעלט דעם בנין צום פארקויפן, און אצינד איז באשטעטיגט געווארן אז די סאטמארע קהילה גייט אפקויפן דעם בנין, און דארט אויפבויען א שפאגל נייע בית המדרש פאר די קהילה, א גרויסע היכל בית המדרש, א היכל התורה און א בית הוראה, שטיבלעך צום דאווענען און א פראכטפולע מקוה, און אלעס וואס פעלט זיך אויס פאר א ריכטיגע בית מקדש מעט.
