אין די יעצטיגע טעג האט הגה"צ ר' אהרן שיף שליט"א גאב"ד אנטווערפן, אפגערייזט דעם קורצן נסיעה צום שטאט בוקארעסט אין ראמעניע, וואו עס איז נארוואס אהערגעשטעלט געווארן א נייע פראכטפולע מצה בעקעריי "אנטווערפענע מצות", ספעציעל פאר די היימישע אידן אין אנטווערפן, אונטער די השגחה פון וועד הכשרות דקהל מחזיקי הדת אנטווערפן.
ביז היינט פלעגט מען אימפארטירן א מאסיווע קוואנטום פון די באקאנטע "קוממיות מצות" און נאך פארשידענע פירמעס, וואס האט אפגעקאסט פאנטאסטישע סכומים און פארשידענע שוועריגקייטן. זעענדיג דעם שטארקן געברויך איז די הנהלה פון קהל מחזיקי הדת אריינגעשפרינגען אין דעם פראיעקט, אהערצושטעלן א אייגענע מצה בעקעריי פאר די לאקאלע אידן, אונטער די השגחה פון ביד"ץ מחזיקי הדת.
די בעסטע אפציע וואו צו מאכן די מצה בעקעריי איז געווען אין שטאט בוקארעסט אין ראמעניע, וואו מען האט שוין טאקע אנגעהויבן צו באקן מצות, דורך חשובע אינגעלייט יראים ושלמים. אצינד האט דער אנטווערפענער רב שליט"א אפגערייזט קיין ראמעניע צו מיטהאלטן פונדערנאנט און געבן די השגחה, א באזוך וואס איז אויסגענוצט געווארן דורך די לאקאלע אידישע קהילה, וועלכע האבן געלאדנט דעם רב אויפצוטרעטן פאר די קינדער און בחורים תלמידים פון די ארטיגע אידישע מוסדות.
