מיט הימל שפאלטענדע געפילן פון שמחה והתרגשות איז היינט צופרי אויפגענומען געווארן די פרייליכע בשורה בקרתא דשופריא, איבער די געבורט פון א בן זכר למזל טוב, די ערשטע קינד ביי הגאון ר' צבי קושלעווסקי שליט"א ראש ישיבת היכל התורה פרעשבורג, זייענדיג שוין העכער די שנות הגבורות, אין עלטער פון אכט און אכציג יאר בליעה"ר.
דער ראש ישיבה האט געוואוינט מיט זיין ערשטע רעבעצין ע"ה פאר קרוב צו פופציג יאר, און נישט זוכה געווען צו זרע של קיימא, די רעבעצין וואס איז געווען א טאכטער פון הגאון ר' לייב גורוויץ זצ"ל ראש ישיבת געיטסהעד, איז נפטר געווארן מיט ארום צען יאר צוריק, און דריי יאר דערויף האט דער ראש ישיבה נאכאמאל חתונה געהאט בזיווג שני, מיט א פופציג יעריגע פרוי מיט עטליכע קינדער.
היינט פארטאגס איז געבוירן געווארן א יונגעלע ביים גליקליכן פארפאלק, ווען דער ראש ישיבה האט זוכה געווען צו האלזן זיין ערשטן קינד אין א מזל'דיגע שעה, נאך לאנגע יארן פון האפן און ווארטן אויף א ישועה. ווען דער ראש ישיבה איז אנגעקומען נאך שחרית אין ישיבה אין די הר נוף געגנט אין ירושלים, האט מען זיך ארויסגעלאזט אין פייערדיגע ריקודין לכבוד די גרויסע שמחה.
