טויזענטער איינוואוינער אין לאנדאן הבירה גרייטן זיך מיטצולעבן זעלטן געהויבענע טעג, ימי אורה און תוספות קדושה וטהרה, שטייענדיג ערב שבת פרה, לטהר טמאים באומר קדוש, אין שפיץ פון המשפיע הגה"צ רבי צבי מאיר זילבערבערג שליט"א ראש חבורת נחלת יעקב, וועלכער קומט היינט אן אין לאנדאן אויף א געהויבענע באזוך נאך פופצן יאר וואס דער משפיע האט נישט געפראוועט אין לאנדאן.
די הויכפונקט פונעם ביקור המרומם וועט זיין די געהויבענע שבת פרה, אין די ריזן זאל פון יסודי התורה אין צענטער פון די היימישע סטעמפארד הילל געגנט, טויזענטער אידן זענען ערווארטעט מיטצוהאלטן די הייליגע תפילות און די לעכטיגע טישן, די ווארעמע שמועסן פונעם משפיע ביים דאווענען פרייטאג צונאכטס, ביי די באטע ליל שב"ק באשמורת הבוקר, ביי קידושא רבא נאכן דאווענען, ועל כולם די פייערדיגע שלש סעודות תורה פאר לאנגע שעה'ן אין די שפעטע מוצאי שבת שעות במעמד אלפי ישראל.
דאנערשטאג נאכט וועט פארקומען א צענטראלע שמועס אין ביהמ"ד הגדול דקהל יטב לב ד'סאטמאר אויף קלעפטאן קאממאן, זונטאג נאכט וועט פארקומען א צענטראלע שמועס אין די גאלדערסגרין געגנט, וואו דער משפיע וועט אויפטרעטן אין די ענגלישע שפראך פאר די ארטיגע איינוואוינער.
מאנטאג פרשת שמיני וועט פארקומען א גרויסארטיגע מעמד און כינוס כללי מיטן נאמען "קימו וקבלו", וואו עס וועלן זיך צונויפנעמען טויזענטער תושבי העיר, זקנים עם נערים, אינגעלייט און בעלי בתים און הונדערטער בחורי חמד תושבי העיר, הגה"צ ר' צבי מאיר וועט אויפטרעטן מיט פלאמפייערדיגע דיבורים זיך צו מחזק זיין קעגן די פגעי הזמן, און אנווארעמען די הערצער זיך צו מקדש ומטהר זיין, און זיך אפשיידן פון די טעכנעלאגישע כלים.
