שטייענדיג אין א גורל'דיגע טאג פאר אחינו בני ישראל דרי ניו יארק רבתי, ווען היינט מיטאג צייט דארף פארקומען א געריכטליכע הירינג אין די פאליטישע קארידארן פון ניו יארק סטעיט, וואו מען וועט דעבאטירן די טרויעריג בארימטע גזירת החינוך וואס שוועבט אויף די חינוך הטהור ביים יהדות החרדית אין ניו יארק, איז פאררופן געווארן אויף היינט דאנערשטאג א געמיינזאמע יום תפילה ובקשת רחמים, צו מעורר זיין רחמים לביטול רוע הגזירה.
צווישן אנדערע איז געמאלדן געווארן מטעם מוסדות סאטמאר, באבוב, וויזניץ, ראחמיסטריווקא, און נאך פיל, אז אין די גענויע צייט פון די הירינג איינס דרייסיג מיטאג, וועט מען אפשטעלן דאס לערנען און נעמען דעם תהלימ'ל אין די הענט אריין, אומנות אבותינו בידינו, און מיט א פאראייניגטע כח הרבים אויסבעטן א ישועה שלימה צו צורייסן די שלעכטע גזירה.
אין ביהמ"ד הגדול דקהל יטב לב ד'סאטמאר אויף ראדני סטריט אין וויליאמסבורג, וועלן זיך צונויפזאמלען די טויזענטער ילדי התשב"ר פון די סאטמארע מוסדות, כחצות היום איינס אזייגער מיטאג, און אינאיינעם בהבל פיהם של תינוקות של בית רבן וועט מען איינרייסן לביטול רוע הגזירה.
היינט צופרי בעפאר קריאת התורה ביי די מנין שחרית פון כ"ק אדמו"ר מבאבוב שליט"א אין גרויסן ביהמ"ד אין בארא פארק, איז דער רב ארויף אויפן ארון הקודש און מעורר געווען דעם ציבור צו דאווענען און מעורר זיין רחמי שמים בשעת די ארון הקודש ווערט געעפנט, אז די רשעים זאלן נישט האבן קיין שליטה אויף אונזער ריינע חינוך, לא ירעו ולא ישחיתו בכל הר קדשי.
