נאך לענגערע יארן פון פלאנירונגען האט מען אין די יעצטיגע טעג אנגעהויבן א מאסיווער פראיעקט אין קרית טאהש אין קאנאדע, צו גענצליך איבערמאכן די אינפאסטראקטשור סיסטעם אין שטעטל, און איבערפלאסטערן פונדאסניי די גאסן אין שטעטל.
דאס קומט זעכציג יאר נאך די התייסדות פונעם שטעטל, ווען מ'האט אויסגעפלאסטערט די גאסן פאר די דעמאלטסדיגע געברויך, אן קיין געהעריגע אפלויף סיסטעם, אן קיין סיידוואלקס און געהעריגע לעמפלעך צו באלייכטן אויפדערנאכט.
דורכאויס די יארן האט מען זיך שרעקליך געמוטשעט מיט די אלטע גאסן, איבערהויפט נאך די גרויסע קאנאדישע שנייען ווען די גאסן זענען געווען צובראכן און צושמעטערט, אבער צוליב די קפידא פון הרה"ק מטאהש זי"ע נישט צו געבן בעלות פאר די שטאטישע אויטאריטעטן אויף די גאסן אין שטעטל, האט מען נישט געקענט געהעריג איבערמאכן די גאסן און איבערבויען די אינפאסטראקטשור.
אצינד איז די הנהלת הקריה אריינגעשפרינגען אין א מאסיווע פראיעקט וואס איז ערווארטעט צו גרייכן די ריזן סומע פון פופצן מיליאן דאללער, ווען אין לויף פון די קומענדיגע זעקס חדשים וועט מען גענצליך איבערפלאסטערן די גאסן, גיסן סיידוואלקס, ארויפבויען לעמפלעך, און איינרישן א פולשטענדיגע אפלויף סיסטעם.
