בלויז עטליכע יאר נאך וואס די טשערנאבילער קהילה אין לאנדאן האט מחדש געווען א נייע בית המדרש לשם ולתפארת, איז די הנהלת הקהילה אצינד אריינגעשפרינגען אין א פרישן פראיעקט, אפצוקויפן נאך א געביידע הארט נעבן די בנין בית המדרש, צו קענען פארברייטערן די ביהמ"ד מיט פיל מער הרחבת הדעת.
די ביהמ"ד איז בליעה"ר אויסגעוואקסן איר געברויך, ווען די צאל אינגעלייט חברי הקהילה וואקסט כסדר, און א פשוטער שבת איז שוין היבש צושטופט אין היכל בית המדרש. אין די יעצטיגע טעג איז די הנהלת הקהילה אריין אין קאנטראקט אפצוקויפן די דערנעבענדיגע בנין אויף 23 נארטפיעלד, הארט נעבן די בנין ביהמ"ד אויף 21 נארטפיעלד, און מיטן אויבערשטנס הילף וועט מען אין די נאנטע תקופה איבערבויען די געביידע און עס צולייגן אלס א פרישע פליגל צום היכל בית המדרש.
נעכטן דינסטאג אויפדערנאכט איז פארגעקומען א ספעציעלע מסיבת לחיים בהיכל ביהמ"ד אין לאנדאן, וואו די חברי הקהילה האבן געדאנקט און געלויבט דעם אויבערשטן אויף די גרויסע חסדים מיט די הרחבת גבולי הקדושה.
