טויזענטער אידן אין אלע חרדישע געגנטער אין ניו יארק האבן היינט מיטגעלעבט א היסטארישע געשעעניש, וואס וועט נישט אזוי שנעל פארגעסן ווערן ביי די וואס האבן דאס בייגעוואוינט. אסאך מענטשן וואס זענען ארויסגעפארן אויף די וועגן און שטעגן, האבן טאקע געהאט די זעלטענע געלעגנהייט צו זיין א טאטאלער ליקוי, צו אין ווערמאונט, אין מאנטריאל, און אין אנדערע שטעט, אבער אין פילע פלעצער, ווי ביי די נייאגרא פאולס און נאך, איז געווען היבש פארוואלקענט, צום טיפן אנטוישונג פון די אלע וואס זענען אהינגעפארן.
דא אין ניו יארק האט מען היבש געקענט מיטהאלטן, אויסער אין מאנסי ווען עס איז געווען פארוואלקנט אין די מינוטן פון די קלימאקס, אבער פארדעם און נאכדעם האט מען געקענט זעהן געהעריג.
פילע אדמורי"ם ורבנים האבן אויסגענוצט די געלעגנהייט צו זעהן מיט די פליישיגע אויגן די גייסטרייכע וואונדער פונעם בורא כל עולמים, צווישן אנדערע זענען געזעהן געווארן מיטהאלטן די ליקוי חמה, כ"ק אדמו"ר מסקווירא שליט"א, כ"ק אדמו"ר מסאטמאר שליט"א, און כ"ק אדמו"ר מוויזניץ שליט"א פון ארה"ק וועלכער איז צוגאסט אין ניו יארק די טעג.
אין ניו יארק סיטי זענען די הויכע דעכער געווען פול מיט ביישויער, און ביי פילע לאקאציעס אין די חרדישע געגנטער, האבן אידישע קינדער זיך ארויסעגעלאזט אין פרייליכע טענץ אויפן ניגון "טובים מאורות שברא אלקינו, צו דאנקן און לויבן דעם הייליגן באשעפער דער עושה מעשה בראשית, אז מען האט געקענט מיטהאלטן דעם היסטארישע מאמענט מיטן גאנצן גלאנץ.
