נאכפאלגענדיג די שרעקליכע שריפה וואס האט אויסגעבראכן נעכטן פארטאגס ביי די ליובאוויטשע בית המדרש חסידים אין פאמאונע הייטס נעבן מאנסי, וואו די גאנצע געביידע איז פארניכטעט געווארן רח"ל, ווי באריכטעט נעכטן דא אויף די נייעס, וועט היינט פארקומען די גרויסע לוויה אפצוגעבן דעם ריכטיגן כבוד התורה און נתעורר ווערן לתשובה ותיקון המעשים.
די גרויסע לוויה וועט פארקומען היינט 4:00 נאכמיטאג מיט די באטייליגונג פון הונדערטער אידן, מען וועט זיך צוזאמנעמען אויפן שטח פון די פארברענטע שוהל, ביים ווינקל פון נארט רידזש און אווערלוק ראוד אין פאמאונע, וואו מען וועט הערן דרשות התעוררות מפי מגידים מפורסמים, און אינאיינעם וועט מען זאגן תהלים לפשפוש ותיקון המעשים.
בשעת די מעמד וועט מען אויך אנהייבן שרייבן א נייע ספר תורה, וואס וועט בעז"ה ווערן אריינגעגעבן צום נייעם ביהמ"ד וואס וועט ווערן אויפגעבויעט דארט אויפן פלאץ, לכונן את בית חיינו, ולהשיב שכינתו בתוכינו.
