שטייענדיג געציילטע וואכן זינט די וועד הקמת הבית אויפצובויען די נייע גיגאנטישע ביהמ"ד אין שיכון סקווירא האט זיך גענומען העפטיג ארבעטן אויפצובויען די נייע דאווענען שטיבלעך בבנין ביהמ"ד הגדול והחדש, איז היינט געמאלדן געווארן די דראמאטישע אנטוויקלונג, אז דעם זונטאג וועלן דריי דאווענען שטיבלעך געעפנט ווערן אויף צייטווייליג.
עטליכע טעג פאר פורים, האבן די עסקנים זיך אריינגעווארפן אין די פאקטישע בוי ארבעט אהערצושטעלן די גאנצע אונטערשטע שטאק פון ביהמ"ד, אריינגערעכנט די זיבן נייע דאווענען שטיבלעך וואס ווערן דארט אויפגעבויעט, דאס איז געקומען נאך א דירעקטע בקשה פון כ"ק אדמו"ר מסקווירא שליט"א, צו פארענדיגן וואס שנעלער די דאווענען שטיבלעך.
אצינד שטייענדיג אין די בין הזמנים טעג ווען די מנינים זענען פיל מער פארנומען ווי געווענליך, האט מען אין א דראמאטישע שריט געמאלדן אז צוליב די גרויסע ציבור, וועט מען עפענען אויף צייטווייליג דריי פון די נייע דאווענען שטיבלעך, כדי מען זאל קענען דארט דאווענען מיט הרחבת הדעת, און דערצו אויך זעהן פונדערנאנט די געוואלדיגע פארשריט אין די מלאכת הבניה.
די דאווענען שטיבלעך וועלכע זענען נאך היבש רוי אצינד, וועלן פארדעקט ווערן מיט ספעציעלע אביעקטן צו קענען דינען אלס צייטווייליגע היכלות, עס וועט זיין אפן פון דעם זונטאג י"ג ניסן, ביז סוף פון בין הזמנים.
