תלמידי וחסידי סאטמאר אין שטאט מאנטריאל גרייטן זיך מיטצולעבן געהויבענע טעג אינאיינעם מיט א חשובער גאסט, הגה"צ אבד"ק ור"ם סאטמאר וויליאמסבורג שליט"א, בנו הגדול פון כ"ק אדמו"ר מסאטמאר שליט"א, וועלכער איז ערווארטעט אנצוקומען מארגן דאנערשטאג אויף א ביקור חיזוק בקרב חסידי סאטמאר אין מאנטריאל.
דאנערשטאג נאכמיטאג וועט דער רב אנקומען לבית האכסניא ביי הנגיד החסיד ר' ברוך מרדכי אבערלענדער הי"ו מחשובי חסידי סאטמאר אין מאנטריאל, דאנערשטאג נאכט וועט פארקומען א ספעציעלע מעמד קבלת פנים לכבודו אין זאל עטרת פיגא, אינאיינעם מיט א מסיבת חיזוק פאר די אינגעלייט און בעלי בתים צוגעשטעלט דורך מפעל "בית נאמן" שע"י קהל יטב לב ד'סאטמאר.
פרייטאג אינדערפרי וועט דער רב דאווענען שחרית אינאיינעם מיט די בחורי חמד, און דערנאך משמיע זיין די דרשת פתיחת הזמן און דברי הדרכה פאר די בחורים. שבת קודש וועט געפראוועט ווערן אויף א געהויבענע פארנעם אין ביהמ"ד הגדול דקהל יטב לב ד'סאטמאר, די סעודת ליל שבת קודש וועט זיין געווידמעט פאר די בחורים, און די סעודה שבת צופרי בבית האכסניא פאר די חשובי הקהילה און די געסט פון ניו יארק.
שבת נאכמיטאג וועט דער רב אויפטרעטן מיט א שיעור אין פרקי אבות, נאכגעפאלגט מיט די געהויבענע שלש סעודות רעוא דרעוין. זונטאג נאכמיטאג וועט פארקומען א מסיבת התחזקות פאר די חברי ורבני הכולל, און ביינאכט וועט פארקומען א צענטראלע אסיפה און כינוס כלל חסידי סאטמאר אין מאנטריאל, וואו דער רב וועט משמיע זיין דברי הדרכה בשליחות הקודש פון אביו הגדול כ"ק אדמו"ר מסאטמאר שליט"א.
