די גאלדענע שטריכן פון כלל ישראל איז ארויסגעקומען צום אויבערפלאך אין די לעצטע פאר טעג, נאך וואס עס איז באקאנט געווארן אז א איד אין איראן איז פאראורטיילט געווארן צו טויט שטראף, און טראץ נאכאנאנדע פרואוון שטייען די אנקלאגער מיט א העפטיגע שטעלונג זיך נישט צו ברעכן אויף קיין שום פאל.
פארלאפענעם דאנערשטאג האבן מיר שוין באריכטעט די נייעס, איבער דער איד נתנאל בן ציונה וואס ווערט באשולדיגט אין אומברענגען א מענטש אומוועלנדיג, און די פאמיליע פון יענע טויטע מענטש וויל אים זעהן געהאנגען פאר יעדן פרייז. הימל און ערד איז געשאקלט געווארן אין די לעצטע צוויי טעג, ווען טעטיגע עסקנים און כלל טוער האבן זיך אריינגעווארפן בלב ונפש דאס צו אפשטעלן, מיט פאליטישע דרוק פון אלע זייטן און וואס נאר מעגליך.
נעכטן מוצאי שבת האט מען ליידער געהערט שווערע נייעס אז די פלענער מארשירן פאראויס, און ווי עס שיינט וועט מען מארגן מאנטאג אים הינריכטן צום תליה רח"ל, אבער מיטן אויבערשטנס הילף איז אינמיטן די נאכט אנגעקומען די בשורה טובה אז מיט העפטיגע שתדלנות האט מען באוויזן אפצושטופן די אורטייל מיט נאך א חודש, וואס באדייט אז מען וועט האבן מער צייט צו ארבעטן אויף די פאמיליע, אריינצומישן פאליטיקאנטן און דרוק לייגער אויף פארשידענע וועגן מיטן אויבערשטנס הילף.
די בארימטע צדק ארגענעזאציע האט זינט דעם דאנערשטאג געקלאפט אויף טירן און טויערן, אריינגעמישט מאכטפולע פיגורן אין די אמעריקאנע רעגירונג און נאך פיל, און בחסדי ה' האט מען באוויזן דאס אפצושטופן, אצינד גייען ווייטער אן העפטיגע שתדלנות צו גענצליך באפרייען דעם איד אויף א גרויסע געלט שטראף, און אידישע קינדער בכל מקומות מושבותיהם זענען מתפלל אז נתנאל בן ציונה זאל געראטעוועט ווערן לאור עולם.
