מיט התרוממות הנפש גרייטן זיך אלופי אלפי ישראל צו מקבל זיין בכבוד הראוי דער חשובער גאסט פון ארצינו הקדושה, מרן ראש הישיבה הגאון הגדול רבי שאול אלתר שליט"א, וועלכער איז ערווארטעט אנצוקומען אויף א געהויבענע באזוך אין ניו יארק מחזק צו זיין קהל עדת צאן מרעיתו, און מרעיף זיין טללי תחיה אויף די יהדות הגולה.
די געהויבענע באזוך טוט צונויפפלעכטן א פרישע רינגעלע אין די גאלדענע קייט, נאך די ערשטמאליגע היסטארישע באזוך פונעם ראש ישיבה אין אמעריקע מיט דריי יאר צוריק, די צווייטע באזוך פארלאפענע יאר, און אצינד איז מען ווידער זוכה לקבל פניו המאירים אין א מזל'דיגע שעה.
ווי ביי די פארגאנגענע נסיעות וועט די געהויבענע באזוך אויפפלאמען טויזענטער אידן לתורה ועבודה, אידישע קינדער וועלן האבן די געלעגנהייט זיך צו דערווארעמען לאורו הבהיר, נהנה זיין עצה ותושיה, און אנצינדן די שלהבת אש קודש דאס פינטעלע איד פון יעדע אידיש קינד.
די הויכפונקט פון די באזוך וועט זיין די גייסטרייכע שבת פרשת בחוקותי וואס דער ראש ישיבה וועט פראווענען בתוככי עיר ואם בישראל בארא פארק, די תפילות און טישן וועלן פארקומען אין די גיגאנטישע זאלן פון "דע פאלאס" ברוב פאר והדר, וואס וועט ווערן אויסגעשטעלט אויף א מייסטערהאפטיגע פארנעם צו קענען פארנעמען די מאקסימום מענטשן וואס מעגליך.
ספעציעל איז ערווארטעט א ריזן ציבור ביים עריכת שולחן הטהור, ביים טיש שלש סעודות בעת רעוא דרעוין, וואס איז ווי באקאנט א זעלטענע מעמד פון התעוררות און חשבון הנפש, ווען מ'זינגט די ניגוני קודש המקובלים, און דער ראש ישיבה איז משמיע פייערדיגע דברות קודש עטליכע מאל, קלארע דיבורים וואס זענען יורד עד דכדוכה של נפש, בפרט אין די יעצטיגע טעג ווען מ'שטייט שוין א קורצע צייט אפגערוקט צום חג השבועות זמן מתן תורתינו הבא עלינו לטובה.
דער ראש ישיבה איז ערווארטעט צו לאנדן אין ניו יארק דעם מיטוואך פרשת בחוקותי כ"א אייר, מיטוואך דורכ'ן טאג וועט ער אפשטאטן א באזוך אין כולל פני מנחם, וואו עס זיצן און הארעווען הונדערטער אינגעלייט, יגעים ועמלים באהלה של תורה יומם ולילה. דאנערשטאג וועט דער ראש ישיבה באזוכן אין די חדר יגדיל תורה אויף די אכצנטע עוועניו אין בארא פארק, און מחזק זיין די ילדי חמד בעבודת הקודש.
דאנערשטאג אויפדערנאכט - אכט דרייסיג אווענט, וועט פארקומען די צענטראלע שיעור אין די פראכטפולע עמינענס זאלן אין בארא פארק, וואו עס וועלן זיך צונויפקומען טויזענטער תושבי העיר למדנים און רבנים, זיך משתעשע זיין באהלה של תורה און מיטהאלטן די אש קודש די תורה ליכט וואס טוט זיך פארשפרייטן אויף יעדן ארום. דערביי וועט דער ראש ישיבה איבערגעבן א ווארעמע שמועס הכנה לחג השבועות, און אנווארעמען די משתתפים זיך צו מחזק זיין בלימוד התורה כדרכו בקודש.
פרייטאג ערב שבת וועט דער ראש ישיבה אפשטאטן א באזוך בקרב תלמידי ישיבה קטנה לצעירים - פני מנחם, און דערנאך איבערגעבן א שיעור עיון פאר די תלמידים און נאך פילע חסידים וואס וועלן קומען מיטהאלטן. זונטאג צופרי וועט דער ראש ישיבה דאווענען שחרית אין די נייע שטיבל פני מנחם אין סטעטן איילענד, וואס איז זינט איר גרינדונג פארוואנדלט געווארן אלס א ריכטיגע חסידישע שטיבל, און פארנעמט א מקום כבוד צווישן די פילע בתי מדרשים אין דעם נייע היימישע ישוב.
זונטאג מיטאג צייט וועט דער ראש ישיבה פארזעצן די נסיעה קיין שיקאגא, אויף א קורצע באזוך פון צוויי טעג אויפצוטרייבן שטיצע לטובת מוסדותיו הקדושים המתנוססים לתפארה בארץ ובגולה.
די מוסדות הקדושים פני מנחם זענען באקאנט איבער די גאנצע וועלט מיט די אויסטערליש איידעלע תלמידים, מלאים וגדושים בתורה ויראת שמים, די תלמוד תורה, ישיבה און כולל, וואס איז נתייסד געווארן באפס מה מיט עטליכע יאר צוריק, און פארמאגט שוין היינט הונדערטער כולל יונגעלייט, הונדערטער ילדי תשב"ר און בחורי ישיבות, וואס זענען זיך משלים בתורה והוראה, אונטער די פערזענליכע באגלייטונג פון מרן ראש הישיבה שליט"א וועלכער פארמאגט א אינערליכע קשר מיט יעדן איינציגן תלמיד.
זונטאג אויפדערנאכט וועט דער ראש ישיבה אויפטרעטן מיט א גרויסע שיעור עיון אין שיקאגא, אין די סוגיא פון שבועה בתנאי, די שיעור וועט פארקומען אין כולל זכרון אליהו מיט די באטייליגונג פון הונדערטער תושבי העיר און טיפזיניגע לומדים, תלמידי חכמים און מרביצי תורה.
מאנטאג אויפדערנאכט וועט פארקומען א פרישע מעמד חיזוק לקראת חג השבועות, מעמד ויחן שם ישראל בראשות גדולי ישראל, די מעמד וועט פארקומען אין ביהמ"ד אגודת ישראל נעבן די ווייטצענע חדר, צוערשט וועט אויפטרעטן מיט דברי פתיחה הגה"צ ר' אברהם שארר שליט"א אב"ד נזר גדליהו, און דערנאך וועט מען הערן א ווארעמע שמועס פונעם ראש הישיבה.
יהא בואו לברכה, ולהרמת קרן התורה והחסידות.
